August 29, 2025

ကျောက်စိမ်းတုံးနှင့် ​သိုက်ကလာတဲ့ကျွန်မ

ကျောက်စိမ်းတုံးနှင့် ​သိုက်ကလာတဲ့ကျွန်မ(စ/ဆုံး)

———————————–

က​လေးဘဝတုန်းက ကျွန်မတို့​မောင်နှမအားလုံးကို အ​မေကိုယ်တိုင် မကြာမကြာ နဖာ​ချေးက​လော်​ပေးသည်။ ကျွန်မ အသက် ၅နှစ် အရွယ်​လောက်က ဖြစ်မည်။ အ​မေက ကျွန်မနားကို သန့်ရှင်း​ပေးရင်း ကျွန်မနားထဲတွင် အစိမ်း​ရောင်အခဲလေး တစ်ခဲကို ​တွေ့ပါ​တော့သည်။

” နားထဲကို ဘာဝင်သွားတာလဲ..သမီး ”

ကျွန်မ မ​ဖြေနိုင်ခဲ့။

” အ​မေ..​ကော်ထုတ်ကြည့်မယ်၊ နာရင်​ပြော​နော် ”

ကျွန်မနားထဲက ထိုအစိမ်း​ရောင်အခဲလေးကို နှစ်​တွေ ​
တော်​တော်ကြာကြာထိ အ​မေ​ကော်ထုတ်ဖို့ ကြိုးစားခဲ့သည်။
တစ်ခါမှ မ​အောင်မြင်ခဲ့၊ ကျွန်မက နားလည်းမကိုက်၊ နားလည်း ကြား​နေရသည်ဆို​တော့ ​ထွေ​ထွေထူးထူးနှင့် ​ဆေးခန်းလည်းသွားမပြပဲ ဒီအတိုင်းပဲ နေလာခဲ့သည်။

အစ်ကိုအစ်မ​တွေက​တော့ ဒါကို ​” ကျောက်စိမ်းတုံး ” ဟု
နံမည်တပ်ကြသည်။ အ​မေ နဖာ​ချေးက​လော်​ပေးတိုင်း
ကျွန်မနားထဲက ​ကျောက်စိမ်းတုံးကို တစ်​ယောက်တစ်လှည့်စီ ကြည့်ရင်း၊ က​လေးသဘာဝ စိတ်ထင်ရာ​ပြောကာ စကြ နောက်ကြ၊ ကျွန်မမှာလည်း ငိုရနှင့်။

” ​. ​နင့်နားထဲက ကျောက်စိမ်းတုံးကို.သိုက်က လာပေးတာ
ထင်တယ် ”

” နင်က ညစ်တီးညစ်ပတ်နဲ့ဆို​တော့ ..ကြွက်သိုက်ကလာ
တာပဲ ဖြစ်မှာ​​ပေါ့ …ဟား ဟား ”

ကျွန်မမှာတော့ ထို​ကျောက်စိမ်းတုံးဆိုတာကို မြင်လည်း
မမြင်ရ၊ အစ်ကိုအစ်မ​တွေက ပြောတိုင်း နား​ထောင်ဖူးသည့် ဥစ္စာသိုက်ဇာတ်လမ်း​တွေထဲကလို ငါ့ကို သိုက်က ပြန်လာ​
ခေါ်မှာလား ​တွေးရင်းသာ အလိုလို ​ကြောက်​စိတ်ဝင်​နေခဲ့သည်။ အ​မေကိုယ်တိုင်ကလည်း ထူးထူးဆန်းဆန်းနှင့် သမီးနားထဲကို ​ရောက်လာသည့် ​ကျောက်စိမ်းတုံးကို စိတ်ဝင်တစားနှင့် အမြဲ​ကော်ထုတ်ဖို့ ကြိုးစားသည်။

​​ဒီလိုနှင့် ကြွက်သိုက်ကပဲလာသလိုလို၊ ဥစ္စာသိုက်ကပဲ​ပေးသလိုလိုနှင့် ဘယ်က​ ဘယ်လိုရောက်လာမှန်းမသိတဲ့ နားထဲမှာ ​ကျောက်စိမ်းတုံး​လေးတစ်တုံးနှင့်ကျွန်မလည်း အသက် ၁၃နှစ်အရွယ်သို့ပင် ​ရောက်ရှိလာခဲ့တော့သည်။
တစ်ည​တော့ ..

” အ​မေ..သမီးရဲ့ နားအဝမှာ တခုခု တစ်​နေတယ်၊
ကြည့်​ပေးပါဦး ”

အ​မေက အိပ်ချင်မူးတူးနှင့်ထထိုင်ကာ ကျွန်မနားကို
ဓါတ်မီးဖြင့် ထိုးကြည့်သည်။

” ဟယ်..ငါ့သမီးနားထဲက ​ကျောက်စိမ်းတုံး အပြင်ကို
ထွက်လာပြီ​​တော့်..”

အ​မေက ဝမ်းသားအားရနှင့် သမီးနားထဲက ထွက်လာသည့် အစိမ်း​ရောင်အခဲလေး​ကို လက်ဖဝါး​ပေါ်တင်ကာ ဓါတ်မီး​ရောင်ဖြင့် ဖင်ပြန်​ခေါင်းပြန်​ ကြည့်ပြီး​​​နောက် ဇ​ဝေဇဝါ စကားဆိုသည်။

” ​ကျောက်စိမ်းတော့.. မဟုတ်ဘူးထင်တယ် ”

” သမီးလည်း.. ကြည့်ချင်တယ် အ​မေ ”

ပထမဆုံးအ​နေဖြင့် ထိုအစိမ်း​လုံး​လေးကို မြင်လိုက်ရသည့် အခိုက်အတန့်မှာ ကျွန်မ၏ စိတ်အာရုံက ၅နှစ်သမီးအရွယ်ကို ချက်ခြင်း ပြန်သတိရသွားသည်။ အိမ်ထဲတွင် အစ်ကို အစ်မ​တွေနှင့် ​ပြေးလွှား​ဆော့ကစား​နေ​သော ကျွန်မက လက်​ချောင်းတွင်ဝတ်ထား​သော ပလပ်စတစ်လက်​စွပ်လေး
အလယ်မှ ပြုတ်ထွက်လာ​သော ကော်​ကျောက်စိမ်းလုံး​လေး
နှင့် ​ဆော့ကစား​ရင်း နားထဲဝင်သွားပုံတို့ကို ရုပ်ရှင်သဖွယ် ပြန်မြင်​ယောင်မှတ်မိလာသည်။

” သမီး မှတ်မိပြီ…ဒါ..ကော်လက်စွပ်က ​​ကော်ကျောက်စိမ်းလုံး​လေး..”

” ဖြစ်ရမယ်.သမီးရယ်..နားထဲဝင်​အောင်​တောင် ​ဆော့ရ
သလား .”

​​ကျွန်မနားထဲက ​ကျောက်စိမ်းတုံးလည်း ညတွင်းချင်းပင် ​​တန်ဖိုး​ပျောက်ကာ ကော်လုံးဘဝ ​ရောက်သွား​တော့သည်။
​တွေးထင်ထားသလို ​ကျောက်စိမ်းတုံးမဟုတ်၍ အ​မေက​တော့ စိတ်ပျက်သွားသည်ထင့်၊ တစ်ချိုးထဲ ပြန်အိပ်​တော့သည်။
အစ်မက​တော့ ​နောက်ဆုံးအချိန်ထိ ကျွန်မကို စဖြစ်​အောင်
စသွားသေးသည်။

” သိုက်နန်းရှင်​တွေ စိတ်ဆိုးသွားလို့ ​ကျောက်စိမ်းတုံးက
​ကော်လုံးဖြစ်သွားတာ ​နေမှာ​ပေါ့..ဟား..ဟား ”

​မှတ်ညာဏ်​အချို့နှင့်အတူ ကျွန်မနားထဲတွင် အချိန်အ​​တော်ကြာ​အောင် ပုန်း​အောင်း​နေခဲ့​သော ကော်လုံး​လေးကို လက်မှာ ဆုပ်ကိုင်ရင်း အ​ကြောင်းအရာအချို့ကို နှစ်အ​တော်ကြာ ​မေ့​ပျောက်​နေတာမျိုးကို အတိတ်​မေ့တယ်​ခေါ်သလား ​တွေး​နေမိသည်။

တစ်ခါက ဖတ်ဖူး​သော ရုပ်ရှင်မင်းသား၊ အဆို​တော်၊ စာ​ရေးဆရာ သု​မောင်၏ သူ့ဘဝအ​ကြောင်း​ရေးထား​သော မဂ္ဂဇင်း
ဝတ္တုတိုထဲတွင်..

သူစာမူပို့ရန် မြို့ထဲသွား​မယ်ပြင်တော့ သမီးက ဖိနပ်ဝယ်ခဲ့ဖို့ လှမ်းမှာသည်တဲ့၊

” သမီး ဖိနပ်ပြတ်​နေပြီ၊ ဖိနပ်အသစ် ဝယ်ခဲ့​ပေးပါ ​​ဖေဖေ ”

​” ​အေး..​ဖေ​ဖေ ဝယ်လာခဲ့မယ်​နော် ..သမီး ”

တစ်ရက် သူ စာမူခထုတ်ပြီး အိမ်အပြန်လမ်းမှာ သမီးက ဖိနပ်အသစ်ဝယ်ခဲ့ဖို့ မှာလိုက်သည်ကို ရုတ်တရက် ပြန်သတိ
ရမိတော့ နှစ်​တွေအ​တော်ကြာလို့ သမီး​တောင် အရွယ်​ရောက်​နေခဲ့ပြီတဲ့ ။

စုမင်းမင်းလတ်