နှလုံးသားနှင့် ဆက်သွယ်ပါ(စ/ဆုံး)
————————–
နေ့လယ်ထမင်းစား နားချိန်ဖြစ်သည်။ ဆရာကြီးက ထမင်းဘူးလေးဖွင့်ကာ ထမင်းစားနေသည်။ ဆရာမ ခင်လေးက အခန်းထဲကို ဝင်လာပြီး
“ဆရာကြီး ဘာဟင်းလဲ” ဟု မေးလိုက်သည်။
“ထုံးစံအတိုင်း ဘဲဥ”
“သမီးမှာငါးပိကြော် ပုလင်းပါတယ်ဆရာကြီး … သွားယူလိုက်ဦးမယ်”
ခင်လေးက မကြာမီ ငါးပိကြော်ပုလင်းလေးကိုင်ပြီး ပြန်ဝင်လာသည်။
“သမီး ထမင်းစားပြီးပြီဆရာကြီး” ဟုလည်း ပြောလိုက်သည်။
ဆရာကြီးက ထမင်းစားပြီးနောက် ထမင်းဘူးကို သိမ်းလိုက်သည်။ စာအုပ်တစ်အုပ်ဖတ်နေသည့် ခင်လေးက ဆရာကြီးကို ကြည့်လိုက်ပြီး
“ဆရာကြီး သမီးတစ်ခုလောက် မေးပါရစေ”
“ဘာလဲကွယ်”
“သမီး ဒီမှာ စာဖတ်နေတာဆရာကြီး မရှင်းလို့ပါ”
“ဘာများ မရှင်းတာလဲကွ”
“ဆရာကြီး Contact နဲ့ Connection ဘာများကွာသလဲဟင်”
ဆရာကြီးက ထိုင်ခုံတွင်ထိုင်လိုက်ပြီး
“အင်း … မေးစရာပဲကွယ်။ Contact နဲ့ Connection ဆိုတဲ့ စကားနှစ်လုံးက အဓိပ္ပာယ်လည်း သွားတူ နေတာကိုး။ Contact ဆိုတာ ဆက်သွယ်မှု၊ အဆက်အသွယ်လို့ အဓိပ္ပာယ်ရသလို၊ Connection ဆိုတာကလည်း ဆက်သွယ်ခြင်း၊ ဆက်သွယ်မှုဖြစ်နေတော့ အဓိပ္ပာယ်တူနေတာပေါ့။ ဒါပေမဲ့ အဲဒီစကားလုံး နှစ်လုံးရဲ့ အလေးအနက်ကတော့ မတူဘူးသမီး”
“ရှင်းပြပါလားဆရာကြီးရယ်”
ဆရာကြီးက ပြုံးလိုက်ပြီး
“ခင်လေး ပဲခူးကပဲလား”
“ဟုတ်ကဲ့ဆရာကြီး”
“မိသားစု ဘယ်နှယောက်ရှိသလဲကွယ်”
“အဖေရယ်၊ အစ်ကိုနှစ်ယောက်ရယ်၊ ညီမလေးတစ်ယောက်ရယ် စုစုပေါင်း လေးယောက်ပါဆရာကြီး”
“သမီးအမေကရော”
“အမေက ဆုံးသွားပြီဆရာကြီး”
“သမီးအဖေနဲ့ ညီအစ်ကိုမောင်နှမတွေကရော ပဲခူးမှာနေလား”
“မိသားစုက တောင်ကြီးမှာပါဆရာကြီးရယ်။ သမီးတစ်ယောက်တည်း ပဲခူးက အဒေါ်တွေနဲ့ လာနေတာ”
“သမီးအဖေနဲ့ စကားပြောဖြစ်ကြသလား။ ဖုန်းနဲ့ဖြစ်ဖြစ်ပေါ့။ နောက်ဆုံး ဘယ်အချိန်လောက်က ပြောဖြစ်သလဲ”
“အဖေနဲ့ လွန်ခဲ့တဲ့ တစ်ပတ်လောက်ကပဲ ဖုန်းနဲ့အဆက်အသွယ်ရပါတယ်ဆရာကြီး”
“ညီအစ်ကို မောင်နှမတွေနဲ့ရော တွေ့ဖြစ်သေးလား။ မိသားစုတွေအားလုံး နောက်ဆုံးပြန်ဆုံဖြစ်တာ ဘယ်အချိန်လောက်ကလဲကွယ်”
“အင်း … သမီး တောင်ကြီးမရောက်တာ တစ်နှစ်လောက်ရှိတော့မယ်ဆရာကြီး။ လွန်ခဲ့တဲ့ တစ်နှစ်ကပဲ မိသားစု ဆုံဖြစ်ပါတယ်”
“သမီးက တောင်ကြီးသွားပြီး မိသားစုကိုတွေ့တာလား”
“ဟုတ်ကဲ့ဆရာကြီး”
“တောင်ကြီးမှာ ဘယ်နှရက်လောက် နေခဲ့သလဲ”
“သုံးရက်”
“အဲဒီ သုံးရက်တာကာလမှာ သမီးအဖေနားမှာ ဘယ်နှနာရီလောက်ကြာကြာနေခဲ့သလဲ”
ခင်လေးကတွေသွားသည်။ သူက အဝေးကိုငေးနေသည်။ ဆရာကြီးက သူ့မေးခွန်းကို ဖြေရမည့်အစား မေးခွန်း တွေချည်း မေးနေသောကြောင့်လည်း ဇဝေဇဝါဖြစ်နေသည်။
“သမီးအဖေနဲ့ အတူတူရှိနေတုန်းမှာ ထမင်းလက်ဆုံ အတူစားခဲ့သလား။ အဖေနေကောင်းရဲ့လားလို့ မေးခဲ့ သလား။ အဖေ့ကိုခြေဆုပ်လက်နယ်ပြုခဲ့သလား”
ခင်လေးက ခေါင်းကြီး ငုံ့နေသည်။
“ခင်လေး ဆရာမေးနေတယ်လေ”
ခင်လေးက မျက်ရည်လေးကို သုတ်လိုက်သည်။ ထို့နောက် ခေါင်းလေးခါပြသည်။
“ခင်လေးရေ … သမီးမေးတဲ့ မေးခွန်းကို ဆရာဖြေတော့မယ် သေသေချာချာ နားထောင်နော်။ သမီးက သမီး အဖေနဲ့ Contact တော့ဖြစ်တယ်။ ဒါပေမဲ့ Connection တော့မရခဲ့ဘူးကွယ်။ ဆရာပြောတာ ရှင်းသလား မသိဘူး”
“သမီးကို ထပ်ရှင်းပြပါဦးလား ဆရာကြီး”
“Contact ဆိုတဲ့သဘောက အဆက်အသွယ်တော့ရတယ် နှလုံးသားချင်း မချိတ်ဆက်မိဘူးဆိုတဲ့ သဘောပဲ ကွယ်။ သာမန် ဖုန်းနဲ့ Contact လုပ်လည်း ရတာပဲ။ နှလုံးသားချင်း ချိတ်ဆက်မိဖို့ဆိုတာ မိသားစုနဲ့ အတူတူ နေထိုင်ရချိန်လေးမှာ နွေးထွေးစွာနဲ့ အတူစား၊ အတူသွား၊ တစ်ဦးနဲ့တစ်ဦး ရင်ဖွင့်၊ တွေ့ရတဲ့ အခိုက်အတန့် လေးမှာ တန်ဖိုးရှိစွာနဲ့ Connection လုပ်နိုင်မှ တကယ်ချိတ်ဆက်မိတာ”
“သမီးသဘောပေါက်သွားပြီဆရာကြီး။ Contact နဲ့ Connection မတူဘူးဆိုတာကိုပါ”
“အေးကွယ် မိသားစုနဲ့ Contact ချည်းမလုပ်ပါနဲ့။ Connection ဖြစ်အောင်လည်း လုပ်ပါ။ မသေခင်လေး တွေ့ရ ဆုံရ၊ ဝမ်းသာရတာပါ။ သေမှ ဝမ်းနည်းပြနေလည်း အလကားပဲ။ ဒါကြောင့် တတ်နိုင်ရင် သမီးအဖေဆီကို ပြန်ပါ။ အဖေနဲ့ အချိန်ဖြုန်းပေးပါကွယ်။ ဒါနဲ့ သမီးအဖေက အသက်ဘယ်လောက်ရှိပြီလဲ”
“၇၆ နှစ်ပါဆရာကြီး”
“အိုခြင်းသဘောကို ရင်ဆိုင်နေရပြီကွယ်။ နာခြင်းသဘောကို ရင်ဆိုင်ရတော့မယ်။ အိုပြီး နာပြီးရင် လူတိုင်း မဖြစ်မနေ သွားကြရမယ့် သေခြင်းသဘောကိုလည်း ရင်ဆိုင်ရတော့မှာပါ။ သမီးအဖေနဲ့ Connection လုပ်ပေး နိုင်အောင် ကြိုးစား သိလား။ ခေတ်ကြီးက Contact တွေ လွယ်လာသလောက် … Connection တွေ ပြတ်လာပြီကွယ်။ သတိထားပါ”
“ဟုတ်ကဲ့ပါ ဆရာကြီး … ခုလို သဘောပေါက်အောင် ရှင်းပြလို့ ကျေးဇူးတင်ပါတယ်ဆရာကြီး။ ဒီကျောင်း ပိတ်ရင်တော့ သမီးအဖေနဲ့ Connection ဖြစ်အောင် လုပ်ပါ့မယ်”
“အေးပါကွယ် … သာဓုပါ။ ခေတ်ကာလကိုက နီးလျက်နဲ့ဝေးနေကြရသူတွေ အများကြီး ဖြစ်လာပြီကွယ်။ ပြန်ဆုံကြရင်တော့ Connection ရအောင် လုပ်ကြတာပေါ့”
“သမီးကို နားလည်အောင်ရှင်းပြပေးလို့ ကျေးဇူးပါဆရာကြီး”
(Ref: The Difference of Contact and Connection)
တင်ညွန့်
၉.၄.၂၀၂၃