ကျုပ်ကမိထွေးလေ

ကျုပ်ကမိထွေးလေ(စ/ဆုံး)

—————————–

ကျုပ်ကမိထွေးလေ မိထွေးဆိုလို့ ကျုပ်တို့ဘုရားရဲ့မိထွေးတော်ဂေါတမီလို မိထွေးတော့မထင်လိုက်ပါနဲ့
ကျုပ်က သူလိုငါလို လူတွေထဲက သူလိုငါလိုမိထွေး
မိထွေးဆိုရင် မကောင်းဘူးလို့ ကျုပ်တို့မြန်မာ့အဖွဲ့အစည်းလူမှုအသိုင်းအဝန်းကဒီလိုပဲပုံသေကားကျမှတ်ယူအရိုးစွဲလာခဲ့ကြတဲ့ မိထွေးမကြီးပေါ့ ကျုပ်က
မြန်မာဇာတ်ကားတွေထဲမှာလည်း တော်တို့ကျုပ်တို့ကြည့်ဖူးလိုက်ရင် ဘယ်မှာတုန်းမိထွေးကကောင်းတာ
လင်ပါသားသမီးကိုနှိပ်စက် လင်ကိုနိုင်အသေချွဲ
ဖအေနဲ့ သူ့သားသူ့သမီး အထင်တွေအမြင်တွေလွဲအောင်ကုန်းချော ကတုန်းကတိုက်လုပ် မိထွေးလောက်နာမည်ပျက်ပြီး မိထွေးလောက်မုန်းစရာ စက်ဆုပ်စရာမရှိအောင်စာရေးဆရာတွေကလည်း ရေးလိုက်ကြတာဆိုတာ

ကျုပ်ပြောမယ် နားထောင်ကြ ငါးထဲမှာ ငါးသလောက်ယောက်ဖဆိုတာကြားဖူးကြလား
ငါးသလောက်လိုအနံ့မျိုးအရသာမျိုးပေးစွမ်းတတ်သလောက် ငါးသလောက်ထက်အရိုးပိုများ ငါးသလောက်ထက်အသားပိုနည်းတတ်လွန်းလို့ စျေးကောင်းမရဘာမရ ကျုပ်တို့ရွာကတံငါသည်တွေကိုယ်တိုင်က
ဒီငါးတွေပိုက်ထဲတိုးလာကြည့်
အိုကွာ ရှုပ်လိုက်တဲ့ ငါးသလောက်ယောက်ဖတွေဆိုပြီး
ငါးပ်ိပဲလုပ်ရလုပ်ရ အနံ့နဲ့စားရသုံးရဆိုပြီး အိမ်ပြန်သယ်လာခဲ့ရတဲ့ငါးတွေ

အေးလေ ကျုပ်တို့မိထွေးတော်တွေကိုလည်းအဲ့လိုကျုပ်တို့ရွာတွေက အဲ့လိုသောက်သုံးမဝင်တဲ့ငါးသလောက်ယောက်ဖနဲ့နှိုင်းပြီး အမေရင်းမရှိလို့သာအစားထိုးသုံးရ မိထွေးကမိထွေးပါတော် ဘယ်မှာလာအမေရင်းလောက်ကောင်းနိုင်ကြပါ့မတုန်း

*****************

ကျုပ်နာမည်က အေးမိစံ တဲ့တော်
ကျုပ်ကိုမွေးတုန်းကဂျပန့်ခေတ်ကိုလွန်ပြီ း လွတ်လပ်ရေးရပြီးကာစ
ကျုပ်က တသွေးတမွေးဖြူဖြူဖွေးဖွေးနဲ့တတုံးတခဲကြီးချောလိုက်သာမှ မူံနေဆိုရောပဲ
မျက်ခွံကမို့မို့ပေမယ့် ကျုပ်မျက်ခုံး မျက်တောင်က လှမှလှ မျက်တောင်မွှေးများဆိုမည်းနက်ကော့ပျံပြီးလန်နေလို့ ကျုပ်ငယ်ငယ်ကကလေးချင်းကစားကြရင်း မျက်တောင်မွှေးပေါ် မီးခြစ်ဆံချောင်းလေးတို့ သစ်သားအစလေးတို့များတင်ကြည့်ကြတာ မျက်တောင်ဘယ်လောက်ခတ်ခတ် ပြုတ်ကိုကျမသွားဘူး။

မျက်ခုံးမွှေးလေးတွေများဆို ကျုပ်တို့အပျိုစင်ခေတ်ကခေတ်ပေါ်သီချင်းတွေထဲကလို သုံးရက်လ ခုံးမျက်စဆိုတဲ့အတိုင်း ကျုပ်မျက်နှာပေါက်က ပြည့်ပြည့်ဝိုင်းဝိုင်း နှာတံကလည်းသေးသေးချွန်ချွန်
နှုတ်ခမ်းလေးများဆို ကျုပ်အဖေတံငါသည်ကြီးပါးစပ်ကခဏခဏကျုပ်ကိုကြည့်ပြီးပြောတတ်တာ ဘာတဲ့
ငါးပူတင်းနှုတ်ခမ်းတဲ့တော် သေးသေးလေးနဲ့စုစုချွန်ချွန်လေးတဲ့တော့် ပြောရမယ်ဆိုတော် ကျုပ်ကမိန်းမချောပဲထားပါတော့။

အဲ့ဒါနဲ့ ဂျပန်မလေးတစ်ယောက်လိုဖြူဖွေးပြီးလှပလွန်းလို့ ကျုပ်အမေနဲ့ကျုပ်အဖေက အေးမိစံဆိုပြီး ကျုပ်ကိုနာမည်ပေးကင်ပွန်းတပ်ခဲ့တာပေါ့….

နာမည်လေးလဲလှ လူလေးလည်းလှသလောက်
ကျုပ်ဘဝက မလှလည်းမလှပါဘူး အေးမိစံဆိုတဲ့နာမည်နဲ့မလိုက်ဖက်အောင် မအေးလဲမအေး မမိလဲမမိ
မစံလဲမစံရပါဘူး။

ကျုပ် အပျိုစင်ပွင့်ဖူး အလှထူးစ တစ်ဆယ့်ခြောက်နှစ်အရွယ်မှာ တစ်ရွာကလာကြက်လာတိုက်ရင်း ကျုပ်အဖေနဲ့အပေါင်းအသင်းဖြစ်နေတဲ့ကိုရင်ငတောဆိုတဲ့သူနဲ့ အနေချင်းနီးစပ် ချစ်ကြိုက်မိကြရင်း
ယောင်နောက်ကိုဆံထုံးပါ တစ်မြို့တစ်ရွာကို အိမ်ထောင်ထူမိခဲ့တယ်ပေါ့။

အရွယ်ချင်းကတော့သိပ်မကွာလှပေဘူး ကျုပ်ကတစ်ဆယ့်ခြောက်နှစ် ကိုရင်ငတောက တစ်ဆယ့်ကိုးနှစ်
အရွယ်နဲ့မလိုက် အရပ်တကာကြက်တစ်ကောင်ပိုက်ပြီးကြက်လည်တိုက်ရင်း ဝါသနာတူကျုပ်အဖေနဲ့ခင်မင်ရင်းနှီးရာက အိမ်ပါလာကျုပ်နဲ့တွေ့ပြီးနှဖူးစာရွာလည်ကြတယ်ပဲထားပါတော့။

ကိုရင်ငတောမိဘတွေကလယ်နဲ့ကျွဲနဲ့အဆင်ပြေပြေပုံတွေပါပဲ သူ့ထက်အကြီးတွေရှိကြပေမယ့် အကုန်လုံးကသူဟာနဲ့သူ အိမ်ထောင်တွေအသီးသီးကျ အိုးခွဲအိမ်ခွဲကုန်ကြပေါ့ ကိုရင်ငတောက ငယ်ငယ်ထဲကကြက်ဝါသနာပါချက်က မိဘတွေက ဘုန်းဘုန်းကျောင်းမှာကိုရင်စည်းပေးထားတဲ့ကြားက ကိုရင်ဝတ်နဲ့ကြက်တိုက်တိုက်နေလို့ ကျောင်းထိုင်ဘုန်းတော်ကြီးကမနိုင်တော့ သူ့မိဘကိုခေါ်ယူပြန်အပ်ရတဲ့ဆီရောက်ရင်း…..

မိဘကိုလည်း လယ်ထဲအိမ်ထဲဝိုင်းမကူ ကြက်တစ်ကောင်ပိုက်ပြီးရွာတကာ့ရွာလယ်ထန်းရည်သောက်ကြက်တိုက်နေတဲ့လူ့ဘော်ကြော့ကြက်သမားကိုမှ ကျုပ်အေးမိစံလင်တော်မိလေတော့
ကျုပ်မှာ ကလေးတစ်ကောင်ရလည်း လူမွေးမပြောင်
နှစ်ကောင်ရလည်း လူမွေးမလှ
သုံးကောင်လည်းရရော ကိုရင်ငတောလည်း ရွာတစ်ရွာကကြက်ဝိုင်းမှာ ကြက်တိုက်ရင်း ခိုက်ရန်ဖြစ် တစ်ဖက်လူက ဓါးနဲ့မွှေ့လိုက်လို့ နေရာတင်အူတွေအခွေလိုက်ထွက်ပုံကျရင်း ပွဲချင်းပြီးပါရောလား….

အဲ့ဒါနဲ့ ကျုပ်အေးမိစံမခမျာ သားသုံးကောင်ပွေ့ပိုက် ကိုယ့်ရပ်ကိုယ့်ရွာ ကိုယ့်မိဘအိမ်ကိုပြန်ရောက်ရပါပေါ့
ယောက်ခမဖြစ်သူက တားပါသေးတော် ဒါပေမယ့်လို့
ယောက်ခမ အမကြီးကသေတာ သူ့သားနဲ့သိပ်မကွာလေတော့ ဒီယောက်ခမအဖိုးကြီးနဲ့ကျုပ်ချွေးမငယ်ငယ်လေး ဘယ်လာသင့်တော်ပါ့မလည်း
အဲ့ဒီတော့ ကျုပ်ရွာ ကျုပ်ပြန်လုပ်ကိုင်စားပါရစေ
သားတွေရှေ့ရေးကရှိနေလို့ပါတော်လို့ အကြောင်းပြ။

ကျုပ်ရွာကျုပ်ပြန်ရောက်တော့ လင်သေမုဆိုးမကျုပ်ကအသက်က သုံးဆယ်နားသီသီစွန်းစ
ကျုပ်လုပ်တတ်ကိုင်တတ်တာက ရွာ့ဓလေ့ရွာ့အလုပ်တွေကလွဲဘာရှိလို့တုန်း စပါးပေါ်ချိန် စပါးရိတ် ကောက်စိုက်ချိန်ကောက်စိုက် ဓနိပျစ်ချိန် ဓနိပျစ်ပေါ့တော်
သားအကြီးကိုတော့ ဘုန်းကြီးကျောင်းသွားပို့ကိုရင်စည်းပေးထားလိုက်တယ် အလတ်ကောင်နဲ့အငယ်ကောင်က တစ်နှစ်ပဲခြားမွေးထားလေတော့ မသိတဲ့သူဆိုအမြွှာလားထင်ရ သူတို့နှစ်ကောင်ကိုတော့ ရွာကျောင်းကလေးတန်းထိပဲသင်ပေးတဲ့ကျောင်းဆိုတော့အဲ့မှာ လေးတန်းထိတက်ခိုင်းထား…..

ကျုပ်အဖေနဲ့အမေလဲ အိုလှပေါ့ သမီးလေးတစ်ယောက်အသက်ကြီးမှမွေးထားရလို့ဖူးဖူးမှုတ်ချစ်မြတ်နိုးခဲ့ကြသမျှ လင်စံရွေးလင်ခွေးနဲ့ညားဆိုသလို အပိ်ျုစင်ဘဝ
ချစ်ကြိုက်တဲ့သူတွေထဲက ပိုက်ဆံရှိ အလုပ်လဲလုပ်ကြတဲ့လူတွေကိုငြင်းလွှတ်မိတဲ့ ကျုပ်ဘဝ မုဆိုးမဘဝနဲ့
ဆယ်နှစ်စွန်းစွန်း လုပ်ကိုင်စားသောက်နေရလည်း
ဘယ်သုကမှ ဆေးဖော်ကြောဖက်အလုပ်မခံရပါဘူး
မလုပ်ဆို
အပျိုစင်ဘဝတုန်းက ချောလှသိမ်မွေ့လှသလောက်
အိမ်ထောင်သည်ဘဝလင်ကအရက်သောက်ထန်းရည်မူးကြက်တိုက်နေလေတော့ နေ့စဉ်နဲ့အမျှ ဒူးနဲ့မျက်ရည်သုတ်ရရင်း ဒေါသတွေထွက်တဲ့အခါထွက်ရ
လင်မယားချင်းသတ်ပုတ်စကားများရတာတွေလဲအခါခါရှိခဲ့ဖူးလေတော့ ကျုပ်ရုပ်က အိုစာကျ
နှုတ်ကလည်း ဘဝကကြမ်းတော့ အလိုလိုနှုတ်ပါကြမ်းချင်လာရောလေ ကျုပ်တို့နဲ့ဘဝတူ လင်ဆိုးမယားကြက်သမားဖဲသမားအရက်သမားမယားတွေကလည်းခပ်များများမဟုတ်လား အဲ့ဒီတော့ ဘဝတူမိန်းမချင်းစု
ရုတ်ရုတ်ရင်းရင်းတွေပြောကြဆိုကြဆက်ဆံကြနဲ့
ဟိုတုန်းက ဂျပန်မနဲ့တူတဲ့ အေးမိစံဆိုတဲ့ကျုပ်
နှုတ်ကြမ်းလျှာကြမ်း ဒေါ်အေးမိကြီးကို ဖြစ်လို့
အဲ့ကြားထဲ လင်ကြက်သမား ဉာဉ့်နက်အချိန်မတော်အိမ်အပြန်ကိုငုတ်တုတ်ထိုင်ထိုင်စောင့်ရင်း ယောက်ခမအမယ်ကြီးသောက်တဲ့ဘော့ဖြူဆေးပြင်းလိပ်ကြီးတွေပျင်းတာနဲ့ယူသောက် ယူသောက် အသောက်ကောင်းလို့ ဆေးလိပ်ကစွဲနေသေး…..

အဲ့လိုနဲ့ပဲတော်ရေ ကျုပ်အသက်လေးဆယ်ကိုကျော်လို့တစ်နှစ်စွန်းစမှာ ကျုပ်တို့ရွာက ကျုပ်နဲ့ဆို ငယ်သူငယ်ချင်းပါပဲ ငယ်ငယ်ကကစားဖော်ကစားဖက်
တစ်ယောက်ကျောပေါ်တစ်ယောက်ခွတက် ထုပ်ဆီးတိုးခဲ့ကြ စိန်ပြေးတမ်းကစားခဲ့ကြဖူးတဲ့ ဖိုးအေးဆိုတဲ့မုဆိုးဖို ပူပူနွေးနွေးကြီးနဲ့ ကျုပ်ကို အဖေတို့အမေတို့ဆွေမျိုးသားချင်းတို့တစ်တွေက အိမ်ထောင်ချပေးကြပါရောလား…..

ဒီဖိုးအေးဆိုတဲ့ လူက အမည်နဲ့လိုက်အောက်အေးချက်ကကမ်းကုန်နေရော ငယ်ငယ်ထဲကအေးတိအေးစက် မခုတ်တတ်တဲ့ကြောင် ကစားဖော်ကစားဖက်တွေထဲမှာ သူ့ဘာသူဘယ်သူတွေနဲ့မှမရောမယှက် သီးသန့်ထွက်ပြီးနေတတ်တဲ့ကောင်ပေါ့တော် အရွယ်လေးရောက်လာတော့ တရွာထဲနေတဲ့ မိစိန်သန်းနဲ့အကြောင်းပါပြီး ကိုယ့်ရွာမှာပဲကိုယ်နေထိုင်လုပ်ကိုင်စားကြရင်းအသင့်အတင့်ချောင်လည်ပါ့။

မိစိန်သန်းကလည်း ကျုပ်နဲ့ငယ်ပေါင်းသူငယ်ချင်းပါပဲ
ဒါပေမယ့် ကျုပ်နဲ့ကတစောင်းစေးနဲ့မျက်ချေးဆိုသလို
သိပ်မတည့်ကြဘူး ခဏခဏရန်ဖြစ်စကားများ ငြင်းခုန်ကြဖူးသူတွေ အရွယ်ရောက်လာတဲ့ထိ ငယ်ငယ်ကအရှိန်တွေနဲ့သိပ်ပြီးအရောတဝင်မရှိလှဘူး သူကလဲကျုပ်ကိုမြင်တာနဲ့မဲ့ရွဲ့ ကျုပ်ကလည်းသူ့ကိုမြင်တာနဲ့ကဲ့ရဲ့
အဲ့လိုနေကြတာ စကားကတော့ လူချင်းတွေ့ရင်ခေါ်တခွန်းမေးတခွန်းတော့ရှိပါရဲ့ များသောအားဖြင့် မတည့်ကြဘူးဆိုပါတော့……

အဲ့လိုနဲ့ မိစိန်သန်းတို့အိမ်ထောင်သက်နှစ်ဆယ်ကျော်ကြာမှ ကံပေါ်တဲ့ကလေးက မိန်းကလေး ကျုပ်ရဲ့လင်ပါသမီးဖြစ်လာမယ့်သူ…..
သူလေးကိုမွေးပြီးတစ်နှစ်ကျော်ကျော်အကြာမှာ အမျိုးသမီးရောဂါနဲ့ မိစိန်သန်းတစ်ယောက် ဘဝတစ်ပါးကိုပြောင်းသွားတယ်ဆိုပါတော့။

အဲ့မှာ လယ်ကငါးဧက နွားကတစ်ရှဉ်းနဲ့ ခြံကလေးဝိုင်းကလေး လက်ဝတ်လက်စားအနဲကျဉ်းကျန်တာလေးနဲ့
ကိုဖိုးအေးတစ်ယောက်သမီးတစ်နှစ်ခွဲသာသာက်ိုလက်မှာဆွဲလို့ မနိုင်မနင်းတွေဖြစ်ကုန်တယ်…..

မိန်းမဆုံးပြီး မိန်းမဘက်ကခယ်မအပျိုကြီးတစ်ယောက်နဲ့ပြန်လက်ဆက်ဖို့ အမျိုးတွေဘက်ကကြိုးစားသေးတယ်ဆိုတာပဲ ဟိုအပျိုကြီးကခါးခါးသီးငြင်းလွှတ် သူ့အစ်မကမွေးတဲ့တူမငယ်ငယ်လေးတော့မွေးစားပါရစေတောင်းတယ်ဆိုလား……
ဒါကျတော့ အသက်ကြီးမှ ရှားရှားပါးပါးမွေးထားရတဲ့သူ့သမီးတော့ ဖိုးအေးလူရိုးကြီးက ခပ်မာမာငြင်းထုတ်သတဲ့တော်။

အဲ့လိုနဲ့ မုဆိုးဖို ပူပူနွေးနွေး ကျုပ်နဲ့ငယ်ဖော်ကစားဖက်သူငယ်ချင်းနဲ့ ကျုပ်ကို လူကြီးသူမတွေကစပ်ဟပ်ပေးစားကြ ဖိုးအေးက ကျုပ်ကိုငယ်တုန်းကတစ်ဖက်သတ်ချစ်ကြိုက်ကြိတ်ပိုးခဲ့သေးလေတော့ သူကလဲမငြင်း ကျုပ်ကလည်း အရင်လင်ကြက်သမားထက်သာတဲ့လူရိုးလူကောင်းလင်ကိုမတော်ချင်ပဲနေမလား

အဲ့ဒါနဲ့ပဲ ကျုပ်က ဖိုးအေးသမီး ဇီးကွက်မ (အမည်ရင်းတော့ရှိသား သူ့အမေလိုမျက်လုံးပြူးပြူးကြီးတွေပိုင်ဆိုင်ထားတဲ့သူမို့ ဇီးကွက်မပဲခေါ်ကြ)ရဲ့ မိထွေးတော်ဂေါတမီအလိုလိုဖြစ်ရော…..ဒီဇီးကွက်မ

********************

“”””” ကိုသူ့အမေဘက်ကအဒေါ် အပ်ျိုကြီးက
ကျုပ်ဖိုးအေးနဲ့ယူယူချင်း အကဲပါပြီးခေါ်ထားသေးတယ်
ဒါပေမယ့် ကလေးကဖအေကိုခင်တဲ့ကလေးဆိုတော့ မရဘူး ဖအေဆီပဲပြန်ရောက်လာတယ်
ဖအေကလည်း သည်းမှသည်း
သူ့သမီးမွ သူ့သမီး
လက်ပေါ်က ကုန်းပိုးရာကမချဘူး….ကျုပ်ကလည်း

“”” သားယောက်ျားကြီးပဲမွေးထားတော့ ဒီဇီးကွက်မ ပြူးတူးတူးကြောင်တောင်တောင်မကိုမြင်တာနဲ့ချစ်ပါတယ် ဒါပေမယ့် သိတယ်မို့လား ကျုပ်ကမိထွေးလေ အများအမြင်မှာ ကျုပ်ကမိထွေး……

ဇီးကွက်မကလည်း ကျုပ်ကိုမြင်တာနဲ့သရဲတစ္ဆေကိုတွေ့သလို ချာကနဲလည်နေအောင်ပြေးတာ
တစ်အိမ်ထဲအတူနေပြီး ကျုပ်နားကိုမကပ်ဘူး
သူ့အမေဘက်က အမျိုးတွေဘယ်လိုတွေနားသွင်းထားလဲပြောလို့ကမရဘူးလေ….””
ကျုပ်နဲ့ဖိုးအေးယူတာကို သူ့အမေဘက်ကဘယ်အမျိုးကကျေနပ်ပါ့မတုန်း ဘာလို့ဆို ကျုပ်ကလည်းကျုပ်
အကြောကခပ်တင်းတင်း
မိစိန်သန်း ကျန်နေခဲ့တဲ့အိမ်နဲ့ခြံထဲ အခန့်သား
အိမ်တွင်းပစ္စည်းအိုးခွက်ပန်းကန် ကြောင်အိမ်ဗီရိုကအစ ယုတ်စွအဆုံး မိစိန်သန်းဆုံးတော့ ဖိုးအေးက သူဆင်ထားတဲ့နားကပ်မို့သူပြန်ချွတ်ယူထားပြီး
ကျုပ်နဲ့ညားတော့ ကျုပ်ကိုပေးဆင်တယ်လေ
တစ်သက်လုံး လင်ဆိုးမယားတဖားဖားဘဝကနေ မွေးကထဲက ကျုပ်မိဘဆင်ထားတဲ့ နားဆွဲတောင်မနေရ
ကျုပ်လင်ကြက်သမား ယူပြီးကြက်တိုက်ပစ်လိုက်တာ
နားပေါက်ထဲ တုတ်ချိုးပြီးထဲ့ထားခဲ့ရတဲ့ကျုပ်??

ပန်တာပေါ့တော် ခရေပွင့်ပုံ ကျောက်နီခြယ်နားကပ်အကြီးကြီးနဲ့ ကျုပ်အေးမိစံ မျက်နှာဝိုင်းဝိုင်းကြီးနဲ့လိုက်မှလိုက်ပဲ””””””

#ကျုပ်ကမိထွေးလေ မိထွေး# ဒုတိယပိုင်းဇာတ်သိမ်း

ဒီဇီးကွက်မဆိုတဲ့ ကျုပ်ရဲ့လင်ပါသမီးလေးဟာ ကျုပ်အနားသာမကပ်တာ အိမ်ခန်းစီးထရံအပေါက်ကတော့ ကျုပ်ကိုချောင်းချောင်းကြည့်သတော့
သူ့အရပ်ကလေးပုတုတုနဲ့ကျုပ်ဘာလုပ်လုပ် ကျုပ်မီးဖိုချောင်ဝင်ချက်ပြုတ်နေလည်း ချောင်း
ကျုပ်အိမ်ရှေ့ထွက်ပြီးဆေးလိပ်ထိုင်သောက်နေလည်းချောင်း ကျုပ်ကလည်း ကလေးချစ်အောင်မစည်းရုံးတတ်ဘူး အမှန်ကမစည်းရုံးတတ်တာထက် မစည်းရုံးချင်တာ ပြောပြီးပါသော်ကော ကျုပ်ကမိထွေးလေ
မိထွေးမှန်သမျှ ဘယ်နှစ်ခါသောက်ကောင်းပြောခံရဖူးလို့တုန်း
ကျုပ်ကအရောတဝင်နေပြန်တော့လည်း လူတွေပါးစပ်ပေါက်က မိထွေးဆိုတာ အစပဲကောင်းချင်ဟန်ဆောင်ကြတာ နောက်တော့ ဘီလူးရုပ်ပေါက် အစွယ်ထွက်ပြကြတော့တာပဲ ဒီလို
ဟော့ တမင်တင်းတင်းမာမာနေပြပြန်တော့လည်း
မပြောဘူးလား မိထွေးပါဆို ခုထဲက မိထွေးသောက်ကျင့်ကပေါ်နေပြီ အဲ့လို
ကျုပ်ဘာလုပ်လုပ် ကျုပ်ဘာပြောပြော မိထွေးဆိုတဲ့အမြင်နဲ့ မျက်မှန်စိမ်းကြီးကတပ်ကြည့်ကြပြီးသား
အဲ့ဒီတော့ နကိုကလည်းကျုပ်ကအကြောကခပ်တင်းတင်း မိစိန်သန်းဘက်ကကျုပ်ကိုကြည့်မရတဲ့သူတွေရှိနေတော့ ကျုပ်က ပိုမျက်နှာကြောတင်းသပေါ့
ကျုပ်သား သုံးယောက်စလုံးကလည်း ကျုပ်အသက်ငယ်ငယ်နဲ့မွေးထုတ်ထားတော့ အကြီးဆုံးသားက ငယ်ထဲကဘုန်းကြီးကျောင်းကိုရင်ဝတ်နဲ့ပို့ထားတာ
အခုတော့ ဘုန်းကြီးလက်ထောက် ခန်းနေဦးဇင်းတောင်ဖြစ်ပြီပေါ့ ကျန်သားနှစ်ယောက်ကလည်း တစ်နှစ်စီကွာပြီးမွေးတော့ အရွယ်ကမတိမ်းမယိမ်း ခုဆို အသက်နှစ်ဆယ်ဝန်းကျင်ရှိပြီ တစ်ယောက်က ကျုပ်အဖေသူ့အဖိုးနဲ့ ပင်လယ်ထဲငါးဖမ်းပိုက်ချ ပိုက်သိမ်းအဖော်ရနေပြီ အဖေတို့နဲ့ပဲနေတာ ကျုပ်ဆီလိုက်မနေဘူး
နောက်တစ်ယောက်က သူ့အဖေဘက်က သူ့ဘကြီးဒေါ်ကြီးတွေရဲ့ရွာမှာ ငယ်ထဲကသွားနေတာ သူ့အဖေဘက်က အချစ်တော်ဖြစ်နေပြီမို့ ကျုပ်ကိုအမေရယ်လို့တောင်မှ မေ့ချင်နေမှာ အဲ့လိုပါဆို သားယောက်ျားလေးတွေရဲ့အမေဘဝက

ကျုပ်လည်း လေးနှစ်ခွဲသာသာလင်ပါသမီးဇီးကွက်မလေးကို သမီးမိန်းကလေးမရှိသူမို့ သမီးလေးလိုပဲချစ်ချင်ပါရဲ့ ဒါပေမယ့် ဘာလို့လည်းမသိဘူး ကျုပ်ချစ်ချင်တာကိုလူတွေသိမှာ ကျုပ်ရှက်တယ်တော့
အဆိုးဆုံးက ဇီးကွက်မအဖေ ကျုပ်လင်ဖိုးအေးသိသွားမှာအဆိုးဆုံးပဲ ဇီးကွက်မကလည်းကျုပ်အနားကိုမကပ်ပါဘူးတော်
ကျုပ်ကလည်း ထမင်းကျွေးတော့မယ်ဆိုမှ ခူးခပ်ပြီး ဟဲ့ ဟိုကောင်မလေး လာ ထမင်းစားတော့ ဒီမှာလက်ဆေးနော် ဖြည်းဖြည်းစား ထမင်းလုံးတစေ့မှကြမ်းပေါ်မကျစေနဲ့နော် ကြားလား အဲ့လိုပြောပြီး အပြင်ထွက်ပြီးနေတာ
အပြင်မှာ ထုံးစံအတိုင်း ဘော့ဖြူဖက်လိပ်ကြီးထိုင်ဖွာပြီး
ဇီးကွက်မထမင်းစားပြီးအောင်စောင့် ဟိုကောင်မလေး ထမင်းယူအုံးမှာလား တော်ပြီလား ဟင်းကုန်ပြီလား အပြင်ကလှမ်းမေး
ကျုပ်ဘယ်လိုမေးမေး ဘယ်လိုပြောပြော ကျုပ်အချစ်တော်မိစိန်သန်းသမီး မယ်မင်းကြီးမလေးက ခေါင်းညိတ်နဲ့ခေါင်းခါကလွဲပြီးဘာမှ မတတ်သလို
ကျုပ်ဘာကျုပ်ပဲ ကြည့်ကျက်ပြီးလုပ်ပေးရတယ်
သူ့အဖေ ဖိုးအေးကတနေကုန်လယ်ထဲမိုးလင်းကမိုးချုပ်တာမဟုတ်လား
တခါတခါ လယ်ထဲသူ့အဖေထမင်းတောင်းသွားပို့ရရင်
သူ့ကိုပါ ကျုပ်က ရေမိုးချိုးပေး သနပ်ခါးထူထူပိန်းပိန်းလူးပေးပြီးခေါ်သွားတတ်ရသေးတယ်
ဇီးကွက်မက ကျုပ်ကိုသာရှောင်ပြီး ထရံပေါက်ကနေသာချောင်းချင်ချောင်းနေတတ်တာ ကျုပ်ကရေချိုးပေးမယ်လာ သနပ်ခါးလူးမယ် လာ အဝတ်အစားလဲ
ခေါင်းဖြီးပေးကျတော့ ငြိမ်ပြီးခံတယ် အနီးကပ်လုပ်ကိုင်ပေးရင်တော့ ကျုပ်ကိုတစ်ချက်လေးမှ မကြည့်ပဲ နေတတ်တယ် ဘယ်လိုအကြောလေးမှန်းတော့မသိဘူး

သူ့အဖေနဲ့တွေ့ရင်တော့ မြူးလို့ပျော်လို့ လန်းဆန်းလို့
နှုတ်ကလဲသွက်လိုက်တာမှ ချက်ချက်ချာချာကိုရှိလို့
အဲ့ဒီလိုနဲ့ တဖြည်းဖြည်းဇီးကွက်မလေးတစ်ယောက်ငါးနှစ်ကနေ ခြောက်နှစ်ထဲရောက်လာတယ်
ခြောက်နှစ်ထဲလည်းအရောက် ရွာက မူလတန်းထိပဲသင်တဲ့စာသင်ကျောင်းမှာပဲ ကျုပ်ကိုယ်တိုင် သူငယ်တန်းကိုတက်ဖို့အတွက်လက်ဆွဲပြီးသွားအပ်ပေးရတယ်

ကျောင်းတက်ပြီဆိုတော့ သိကြတဲ့အတိုင်း အမိအဖနဲ့စပြီးခွဲရတဲ့သူငယ်တန်းကလေးတွေနဲ့မအေတွေနဲ့လုံးထွေးလုံးထွေး ဆူညံဆူညံ ကလေးတွေငိုလိုက်ကြတာလည်း ကျွက်ကျွက်ကိုရိုက်လို့
ကျုပ်တို့မိထွေးနဲ့လင်ပါသမီးကိုလည်း တရွာထဲသားအကြောင်းသိအစင်းသိတွေက ကွက်ကြည့်ကွက်ကြည့်ပေါ့ ဘယ်သူကြည့်ကြည့် ကျုပ်ကသောက်ဂရုမစိုက်ပေါင်တော် ဘော့ဖြူဖက်ကြမ်းလိပ်ကြီးတငေါ့ငေါ့နဲ့
ကျောင်းခေါင်းလောင်းမထိုးမချင်း ကျုပ်လင်ပါသမီးကိုစောင့်ကြည့်ပေးနေလိုက်တယ်

အောင်မယ် မိစိန်သန်းသမီးက သူ့အမေလို အကြောကခပ်မာမာတော့်
ငိုပြီးမအေ့ထမိန်စလိုက်ဆွဲနေတဲ့နှပ်ချေးတွဲလောင်းကလေးတွေကြားမှာ ကျုပ်ကိုယ်တိုင်လိမ်းပေးထားတဲ့ သနပ်ခါးဖက်ရွက်ပုံမပျက်ဘူး မျက်ရည်တစက်လေးမှ မကျဘူး ခေါင်းကိုအုန်းဆီရွှဲနေအောင်လူးပေးပြီးကြက်တောင်စီးနှစ်ဖက်ခွစည်းပေးထားတော့ ပြောလို့ပြောတာမဟုတ် ကျုပ်ရဲ့ လင်ပါသမီးလေးက အချောသားတော့်

အဲ့ဒါနဲ့ ကျောင်းခေါင်းလောင်းထိုးသွားတော့
မအေတွေနဲ့ ကလေးတွေတိုက်ပွဲပိုပြင်းထန်လာတော့တာမှ တချို့ကလေးဆိုးကြီးတွေဆို မအေ့ခါးပေါ်အတင်းခိုကပ်ခွတက် မအေကရိုက်ချ ဆရာမကဆွဲခေါ်
တကယ့်ကိုပွက်လောကိုညံလို့
ကျောင်းအပြင်ဘက်မှာ မအေတချို့ သူတို့သားသမီးကိုစိတ်မချလို့ မတ်တပ်စောင့်ကြည့်တော့ ကျုပ်လဲရောယောင်ပြီးရပ်ကြည့်မိသေးတယ် ကျုပ်ရဲ့ဇီးကွက်မကို

ကျုပ်ရဲ့ဇီးကွက်မလေး ကျောင်းပြတင်းပေါက်ကနေ ခေါင်းလေးစောင်းပြီးဟိုဟိုဒီဒီ ရှာကြည့်နေတာတွေ့တော့
ကျုပ်ရင်ထဲ လှိုက်ခနဲနေတာပါပဲတော် ဘယ်လိုပြောရမှန်းကိုမသိဘူး ကျုပ်ငိုချင်တာမှ တော်တကယ်ပါ
ရင်ဘတ်ကြီးထဲ မှာအလုံးကြီးကလုံးလုံးပြီးအပေါ်ကိုဆောင့်ဆောင့်တက်လာတာမှ

မဖြစ်ချေဘူးတော့် ကျုပ်မျက်နှာအမူအရာပျက်ယွင်းနေတာကိုဘေးကကလေးမအေကောင်မတွေတွေ့လို့မဖြစ်ဘူး ကျုပ်ကိုသူတို့ကဲ့ရဲ့ပြစ်တင်ပြောဆိုချင်နေကြတာ
ကျုပ်က လင်ပါသမီးကိုချစ်ချင်ဟန်ဆောင်ပြနေတာသရုပ်ပါတယ်တောင်လုပ်နေမှာ ပြန်မှဖြစ်မယ်ပြန်မှ

အဲ့လိုနဲ့ သူများကလေးမအေတွေလိုကျုပ်ရပ်စောင့်မနေတော့ဘူး အိမ်ကိုခပ်သုတ်သုတ်ပြန်
အိမ်ပြန်ရောက်တော့ ပိုဆိုးတယ်တော်ရေ
ဇီးကွက်မ ကျုပ်ကိုချောင်းကြည့်နေကျ အိမ်ခန်းစီးထရံပေါက်ကိုမြင်ပြီး ကျုပ်မှာ ငိုချချင်စိတ်ကိုပေါက်ရော
အို ငိုတယ်လေ ဘာဖြစ်တုန်း ကျုပ်အိမ်ထဲကျုပ်ငိုတာ ဘယ်သူမြင်တာမှတ်လို့

ငိုတယ်တော် ငိုတယ် ကျုပ်ဇီးကွက်မလေးကိုလွမ်းတယ်တော့် လွမ်းတယ် သူကျောင်းမသွားခင်ချွတ်လဲခဲ့တဲ့သူအိင်္ကျီဂါဝန်ဟောင်းလေးကိုကိုင်ပြီး ကျုပ်နမ်းတယ် ငိုတယ် မျက်လုံးထဲကထွက်ဘူးတော် ကျုပ်ကိုဇီးကွက်မလိုက်ရှာနေပုံလေး

အဲ့လိုနဲ့ ကျောင်းတက်ကျောင်းပြန် ကျုပ်လိုက်လိုက်ပို့လိုက်လိုက်ကြိုကိုတစ်လလောက်ပဲလုပ်ပေးရတယ်
နောက်တော့ အိမ်နီးချင်းသူ့အရွယ်ကလေးဖော်တွေနဲ့အလေ့အကျင့်ဖြစ်ပြီး ကျုပ် အပို့အကြိုလုပ်ပေးစရာမလိုတော့ဘူး
ကျုပ်မှာလည်း အလုပ်ကအများသားလေ
ကိုဖိုးအေးနောက်ကိုထမင်းတောင်းလိုက်ပို့ရတာတမျိုး
သူ့အလုပ်ဝိုင်းကူလုပ်ပေးရတာမျိုးကလည်းရှိနေတတ်သေးတော့ အိမ်ဗာဟီရကတစ်ဖက် ဇီးကွက်မကို ကျောင်းတက်ဖို့ပြင်ပေးဆင်ပေး ထမင်းချိုင့်ထည့်ပေးရတာကတစ်ဖက်ရယ်

အဲ့ ကျုပ်ပြောဖို့တစ်ခုကျန်နေခဲ့သေးတယ်
ဇီးကွက်မအဖေ ကျုပ်လင်ဖိုးအေးဆိုတဲ့လူရိုးလူအေးကြီးက ငယ်ငယ်တုန်းကအေးသလောက်ရိုးသလောက်
အခုအရွယ်ကျ သောက်အရက်ကလေးကတမြမြဖြစ်လာပြီ
လယ်ထဲအလုပ်ကပင်ပမ်းတာအကြောင်းပြပြီး မိစိန်သန်းမကွယ်လွန်ခင်ကထဲက သင်းကသောက်တတ်စားတတ်နေပြီ သောက်တာကိုကျုပ်ကအပြစ်ပြောနေတာမဟုတ်ပါဘူး ကျုပ်ဟိုအရင်လင်တုန်းက သူ့ထက်တောင်ကျွမ်းပြန်အောင်သောက်တတ်သေးတာ
အခုက ကျုပ်ပြောတာက ညဘက်ကျမှ လယ်ထဲကအိမ်ပြန်ရောက်မှ အရက်ပုလင်းဝယ်လာပြီး ထမင်းမစားခင်ဆေးဖြစ်ဝါးဖြစ်မှီဝဲတာ ကျုပ်အပြစ်ပြောစရာမရှိဘူး
အဲ သောက်ပြီးရင်တော့ မသောက်ခင်ကဖိုးအေးနဲ့တခြားစီဖြစ်သွားပြီ အိညက်အိညက်နဲ့ သောက်စကားတွေများလိုက်ပြောလိုက်ရစ်လိုက်တာမှတော်
အရင်မိစိန်သန်းနဲ့တုန်းကတော့မသိဘူး
ကျုပ်ကတော့ ဦးစွန်းဖုတ်သာဆောင့်ဆောင့်ဆွဲ ကုတ်ချင်ဖြဲချင်လာတော့တာပါပဲ
အရက်သမားတွေမူးပုံရစ်ပုံခြင်းက တစ်ယောက်နဲ့တစ်ယောက်မတူကြဘူးတော် ကျုပ်ကလင်နှစ်ယောက်ရခဲ့ဖူးတော့ လင်နှစ်ယောက်စလုံးကအရက်သောက်တာခြင်းလဲတူတော့တူကြပါရဲ့
သောက်ပြီး မူးပုံရမ်းပုံခြင်းကျကွာသွားပါလေရော
ဟိုအရင်လင်ကြက်သမားမူးလာရင် ခုနှစ်အိမ်ရှစ်အိမ်ကြားအော်ဟစ်ဆဲဆိုချင်ဆဲဆို သီချင်းတွေအကျယ်ကြီးအော်ဆိုလိုအော်ဆို
ကျုပ်နဲ့လည်း သူတပြန်ကိုယ်တပြန်နပန်းဖက်လုံးချင်ဖက်လုံးသတ်ပုတ်ခဲ့ကြတာ
ခု ဒီလင်ကိုဖိုးအေးကျ အဲ့လိုမဟုတ်ဘူး နကိုကစကားတိုးတိုးမပွင့်တပွင့်ပြောတတ်တဲ့သူက မူးလဲလာရော
အသံကပိုပြီးတိုးသွားတယ် ပိုပြီးမပွင့်တပွင့်ဖြစ်သွားတယ် အဲ့ဒါမကောင်းဘူးလားဆိုတော့ သူများတွေအမြင်တော့ ဟုတ်ချင်ဟုတ်မယ် ကျုပ်အေးမိစံကြီးအတွက်တော့ မကောင်းပါဘူးတော့်

ဘယ် ကျုပ်က နကိုကစကားကိုအော်ကျယ်အော်ကျယ်ပြောတတ်သလောက် နားကနဲနဲလေးမဆိုစလောက်လေးလေးနေတတ်တဲ့သူ
အရင်လင်ကြက်သမားနဲ့တုန်းက သူကမူးလာရင်အော်ပြီးပြော ကျုပ်ကလည်းအမူးသမားနဲ့တုပြီးပြိုင်အော်
ဟုတ်နေကြတာ
သတ်ကြပုတ်ကြရင်လည်း သူတပြန်ကိုယ်တပြန်

အခုတော့ ဒီလိုဘယ်ဟုတ်မတုန်းတော်
မပွင့်တပွင့် အာလေးလျှာလေးနဲ့ ကျုပ်ကိုစကားတခွန်းမပြီးမချင်းဒါပဲထပ်ချည်းတလဲလဲပြော ကျုပ်ကနားကမကြား ထမင်းခူးခပ်ကျွေးထားပြီးလည်း တော်ကြာနေရင်း အေးမိရေ ငါထမင်းစားတော့မယ်လေဟယ်
လုပ်ချင်လုပ်နေတာ ကျုပ်က တော်ခုလေးတင်မြိုပြီးဆို့ပြီးပြီလေ ဘယ်နှစ်ခါမြိုချင်သေးတုန်း အဲ့လိုစိတ်မရှည်လို့ထအော်တော့ အမူးသမားကဒါကျတော့ရှက်တယ်လေ တိုးတိုးပြောပါအေးမိရယ် ငါမစားရသေးဘူးထင်လို့ပါ
အိပ်ယာထဲရောက်သွားသည်ထိ မအိပ်နိုင်သေးဘူး
အေးမိ ငါထမင်းမှစားပြီးရဲ့လား အ ပြန်ပြန်အထပ်ထပ်မေးတတ်သေးတာ
ကျုပ်က မကြားချင်ဟန်ဆောင်ပြီးနေလို့ရသလောက်တော့နေပါတယ် တခါတခါကျတော့ ရွဲ့ချင်ရွတ်ချင်လာတာနဲ့ ကဲ ထ ထ ထပ်ပြီးမြိုချင်ဆို့ချင်သေးတယ်မို့လား ခူးပြီးခပ်ပြီးပြီ ထစား
အဲ့လိုကျတော့ ဘာပြောတယ်မှတ်သတုန်း
ငါ့ကိုခဏခဏခူးမကျွေးပါနဲ့ဟ
ငါထပ်မစားနိုင်တော့ဘူးလေဟာ ညည်းကလဲငါ့ကိုထမင်းကျွေးပြီးအသေသတ်နေတာလားတဲ့ အဲ့ဒီလိုပါဆို

တမျိုးမဟုတ် တမျိုး ညတိုင်းအဲ့လိုပုံစံမျိုးနဲ့ရစ်တာ

**********************

ဇီးကွက်မလေးသူငယ်တန်းကတစ်တန်းတက်တဲ့နှစ်ရောက်တဲ့ထိ ကျုပ်တို့အိမ်ထောင်ရေးက သူများတွေအမြင်မှာ အေးအေးဆေးဆေးပေါ့
အတွင်းမှာ အဲ့လိုလှိုက်စားနေတာဘယ်သူသိမှတ်လို့
ကျုပ်နဲ့ဇီးကွက်မပဲသိတယ်
ဇီးကွက်မကတော့ သူ့အဖေနဲ့ကျုပ်အဲ့လို ကတောက်ကဆညတိုင်းတိုးတိုးတမျိုး မတိုးတတိုးတမျိုးဖြစ်ဖြစ်နေတာတော့ ကလေးဆိုပေမယ့်သိတယ်
မျက်ပြူးဆံပျာနဲ့မလှမ်းမဝေးကနေ သူ့အတွက်ပေးထားတဲ့အခန်းလေးထဲကနေချောင်းချောင်းကြည့်တတ်တယ်
သူ့ဖအေကလည်း ကျုပ်ကိုသာမက သူ့သမီးကိုပါ ခေါ်ပြီးရစ်တတ်သေးတာလေ

သမီးလေးဇီးကွက်မလေး လာအုံးအဖေ့ဆီကို
အဖေ့ကိုတက်နင်းပေးစမ်း
သမီး ညည်းကိုညည်းအမေ အဖေမရှိတုန်းဆူသေးလား ရိုက်သေးလား အဲ့လိုတွေကျုပ်ရှေ့ထားပြီးမေးချင်မေးတတ်သေးတာ
ကျုပ်ကို အမေခေါ်တတ်အောင် စညားထဲကသူ့အဖေသင်ပေးထားတတ်ပေမယ့် ခုချိန်ထိ အမေလို့တခါမှဒီဇီးကွက်မပါးစပ်ကမထွက်ဖူးဘူး
စကားလဲများများမှ တခါဖူးမှ မပြောဖူးတာကိုး
ကျုပ်ကလဲ ကျုပ်ကိုကျုပ်တခါမှ အမေလို့မသုံးနှုံးဖူးသလို သူ့ကိုလဲ သမီးလို့တခါဖူးမှ မခေါ်ခဲ့ဘူး

ညည်းနဲ့ကျုပ်နဲ့ပဲ သုံးနှုံးခဲ့တာအကျင့်ဖြစ်နေပြီ

ကျုပ်က အဖြေရခက်နေတဲ့ကလေးကို သွားအပြင်မှာ ကိုယ့်စာကိုယ်သွားကျက်နေ တော့်,ကဖိုးအေးတော်ဘာဖြစ်နေလည်း မူးနေရင်လည်းအေးအေးနေစမ်းတော် ကလေးပါခေါ်ပြီးရစ်မနေနဲ့
တော်ကျုပ်စိတ်ကိုသိတယ်နော် ကျုပ်သီးခံနေတာအကောင်းမှတ်နေလား အဲ့လို တိုးတိုးကြိတ်ကြိတ်နဲ့လည်းကျုပ်မှာ မာန်ရမဲရသေး

အမူးသမားတွေနဲ့တုပြီးပြောရတာပြောတဲ့သူပဲ မောတယ်

အဲ့လိုပုံစံမျိုးအတိုင်းသွားရင်းတစ်နေ့မှာ ပြဿနာကဖြစ်ချင်လာတော့

တစ်ရွာတစ်ကျေးမှာအိမ်ထောင်သွားကျနေတဲ့ ငယ်ပေါင်းမိတ်ဆွေတစ်ဦးအိမ်အလည်ရောက်လာပါရောလား နွားအရောင်းဝယ်လိုလိုကျွဲအရောင်းအဝယ်လိုလိုနဲ့တော် နှစ်ရက်သုံးရက်ကြာတယ် ညနေဘက်ညနေဘက်သောက်လိုက်ကြစားလိုက်ကြ သောက်စကားတွေလဲများလိုက်ကြသမှ

ကျုပ်လင် ကဖိုးအေးကလည်းအိညောင့်ညောင့်နဲ့စကားကခပ်များများ ဟိုဧည့်သည်အကောင်ကလည်းခပ်များများ ငယ်ငယ်ကကစားဖော်ကစားဖက်တွေပေမယ့်
နှစ်တွေကြာကြာကွဲကွာနေကြသူချင်း တွေ့ရဆုံရချိန်လေး ပြောစရာစကားတွေကမကုန်နိုင်မခမ်းနိုင်

အဲ့မှာ ဘယ်စကားတွေပါလာသလည်းဆိုတော့ ကဖိုးအေးအရင်မိန်းမမိစိန်သန်းအကြောင်းတွေပါလာလေရော
ဧည့်သည်ကလဲပါးစပ်စည်းကမ်းကမစောင့် ငယ်မွေးခြံပေါက်တွေချည်းမို့ စည်းစောင့်ဖို့မလိုဘူးလည်းသင်းကတွက်နေမှာပေါ့

မိစိန်သန်းအပျိုတုန်းကဘယ်လိုလှကြောင်းချောကြောင်းဆိုတာတွေတင်မက ကျုပ်အေးမိစံရှေ့ထားပြီး အေးမိစံ နင်လည်းအပျိုတုန်းကလှသလောက်ခုတော့အဖွားအိုပေါက်စနဖြစ်လို့နေပေါ့လား ပြောလို့ပြော
ကျုပ်လဲ စိတ်ကပေါက်နေတာနဲ့ တော့်ခေါင်းလဲတော်ပြန်ကြည့်အုံးလေ ဆံဖြူလို့အိုဆိုးပေါ့ သေမင်းကမျက်စလှမ်းပစ်လို့နေပေါ့
စပ်ဖြဲဖြဲ ပြောင်စပ်စပ်နဲ့အပြောင်အပြက်ပြောရာကနေ
ဟဲ့ အေးမိစံ နင် မိစိန်သန်းနဲ့ငယ်ငယ်ထဲကတည့်တာမဟုတ်ဘူး ငါတို့သိတယ်နော် ဒီကောင်ဖိုးအေး နင့်ကိုကြိုက်နေတာလဲ မိစိန်သန်းသိသိနဲ့ ဖိုးအေးကိုယူတာ
အေးလေ နင်ကအရင်လင်ယူသွားတာကိုးဟ
ဒီကောင်ကြီးရင်ကွဲနာကိုမိစိန်သန်းကကုစားပြီးယူလိုက်တာ
မိစိန်သန်းကျေးဇူး နင့်မှာရှိတယ်နော်
မိစိန်သန်းအငတ်အပြတ်ခံစုဆောင်းခဲ့လို့ နင်အခုတော့ ရေကန်အသင့်ကြာအသင့်ဖြစ်နေပေါ့လား

ပြောရင်းပြောရင်းနဲ့အရက်သမားပါးစပ် စည်းကမ်းမဲ့လာပုံက ကြည့်ပါလား

နင်ဟာ အဲ့ဒါနဲ့များ သူမွေးခဲ့တဲ့သူ့သမီးလေးဇီးကွက်မအပေါ်တော့မအေတစ်ယောက်လိုမေတ္တာမျိုးပေးသင့်ပါတယ်ဟာ သမီးရင်းလေးတစ်ယောက်လိုချစ်သင့်ပါတယ် ငါရောက်နေတာနှစ်ရက်ရှိပြီ နင်တခါမှ သမီးလို့ခေါ်တာလဲမတွေ့ ဇီးကွက်မလေးကလည်းနင့်နားကိုလည်းကပ်နေတာမတွေ့ ကလေးကနင့်ကိုကြောက်နေတာဟ နင်ကမအေလိုမနေပဲ မိထွေးလိုသူစိမ်းဆန်ဆန်နေပြမှတော့ ကလေးကစိမ်းပြီပေါ့ ငါက သူငယ်ချင်း အချင်းချင်းမို့ပြောတာနော် စေတနာနဲ့ စေတနာ

ကျုပ်ဒေါသတွေအချောင်း အချောင်းနဲ့ထွက်လိုက်သမှ
ကျုပ်အိမ်မှာလည်းလာတည်းခိုနေသေး ကျုပ်ကျွေးတာလည်း စားပိုးနင့်အောင်စားသေးသောက်သေး
ကျုပ်ကိုများ ဒီအိမ်နဲ့ဘာမှမဆိုင်သူလို သွားလေသူမိစ်ိန်သန်းကို အမွှမ်းတင်ပြီးကျုပ်နဲ့ကလေးကိုသွေးကွဲစကားပြောတဲ့ သေနာကျဧည့်သည်ကောင်

သွား ဘယ်ငယ်သံယောဇဉ်မှ ကျုပ်မှာမရှိဘူး
အနားမှာရှိတဲ့ ဆေးလိပ်ပြာခွက်လုပ်ထားတဲ့ဝါးဆစ်ခွက်ကြီးနဲ့ ကျုပ်ပိတ်ပေါက်ချပစ်လိုက်တာ
ပြာတွေကတဖွေးဖွေး
ခေါင်းကိုထိသွားတဲ့ဧည့်သည်ကောင်ဘက်ကနေ ကျုပ်လင်ကဖိုးအေးအမူးက ဘာထပြောလဲ သိကြလား

ဟဲ့ အေးမိ သူကဟုတ်တာမှန်တာပြောတာ နင်ကနာစလား ငယ်တုန်းကလဲတို့တတွေ ဒီလိုပဲ ပြောမနာဆိုမနာပြောနေကျဟာ နင်ကလဲ မိထွေး မိထွေးမို့ မိထွေးပြောတာကို နာစရာမှတ်လို့

ကျုပ်လေ အဲ့စကားအနာဆုံးပဲတော့
မှန်တာပြောလို့ နာကြတဲ့စကားထဲမှာ ဒီမိထွေးဆိုတဲ့စကား ကျုပ်အနာဆုံးပဲတော် ကျုပ်အနာဆုံးပဲ
အထူးသဖြင့် ဟိုဧည့်သည်ငမူးကောင်ပြောတာထက်ကျုပ်လင်ကပြောတာ ကျုပ်အသဲပိုနာတာ

ကျုပ်ဘာမှ ပြန်မပြောပဲ ချက်ချင်းပဲဆုံးဖြတ်ချက်ချပစ်လိုက်တယ် ကျုပ်အဝတ်အစားတွေ အိမ်ခန်းထဲဝင်ပြီးဆွဲထုတ်လာခဲ့လိုက်တယ် ဗီရိုထဲမှာရှိတဲ့ ကျုပ်အဝတ်တွေဆွဲထုတ်
အိတ်ထဲထိုးထည့်
ကျုပ်ရင်ထဲကိုဝင်ကြည့်ကြစမ်း အဲ့အချိန် ကျုပ်ရင်တွေဗြန်းဗြန်းကွဲပေါ့ နာလွန်းလ်ို့ ဒေါသထွက်လွန်းလို့ အသားတွေလဲဆတ်ဆတ်ဆတ်ဆတ်တုန်လို့

ကျုပ်နားထဲက မိစိန်သန်းနားကပ် ကျုပ်သိပ်ကြိုက်ပေါ့
ခုတော့ မခံချင်တဲ့မာနက နှိုးဆော်လာတော့ ကျုပ်ဆွဲဖြုတ် ရော့ တော့်မိန်းမကျေးဇူးရှင်မကြီးပစ္စည်း
ကျုပ်ထားခဲ့တယ်နော် ကျုပ်ကိုဘာတခုမှထပ်မပြောကြနဲ့

ကဖိုးအေး ကငေါင်တောင်တောင်နဲ့ကျုပ်လုပ်သမျှတွေကြည့်နေတယ် ဟိုဧည့်သည်သေနာကျကောင်က သူစပေးတဲ့ဇာတ် သူမနိုင်မှန်းသိတော့ ဘယ်အချိန်အိမ်ပေါ်ကဆင်းပြေးသွားတယ်မသိဘူး မတွေ့ရတော့ဘူး

ကျုပ်အထုပ်ပိုက်ပြီး အိမ်ပေါ်ကအဆင်းကျုပ်နောက်ကအရိပ်ကလေးတစ်ခုပါလာတယ်
ကျုပ်လှည့်ကြည့်လိုက်တော့ ဇီးကွက်မ
မျက်လုံးပြူးပြူးဝိုင်းဝိုင်း လေးကမျက်ရည်တွေပြည့်လို့ ကျုပ်ထမိန်စကိုလှမ်းဆွဲတယ်
ကျုပ်ရင်ထဲတော် ဘာပြောကောင်းမလည်း
ဒေါသကလည်းအရှိန်ကမပြေသေးလေတော့
ဘာလည်း ညည်းကဘာပြောချင်သေးလို့လည်း
ကျုပ်ကမိထွေးလေ မိထွေး
ညည်းဘာပြောချင်လို့လဲ ပြော ကျုပ်ကမိထွေးဆိုတာပြောချင်လို့လား

ဟီးဟီး ဟီး အမေ့ တဲ့
ကျုပ်အော်ဟစ်ပြီးပြောလိုက်မှ ဇီးကွက်မ ချုံးပွဲချငိုပါရောလား ပြီးတော့ ကျုပ်နားကြားများလွဲသလား
အမေ့လို့ခေါ်လိုက်သလား

အမေ အမေ့ သမီးလည်းလိုက်မယ် အမေသမီးကိုလည်းခေါ်ပါအမေ တဲ့တော်
ကျုပ်နားကြားမလွဲဘူးတော်ရေ

ကျုပ်လေ ကျုပ်ကိုယ်ကျုပ်ဘာလုပ်လိုက်မိမှန်းတောင်မသိတော့ပါဘူးတော်
ကျုပ်သတိရတာတော့ ကျုပ်ဇီးကွက်မကိုခါးထစ်ကောက်ခွင် ပြီး ကျုပ်အဝတ်ထုပ်ကြီးကို ကျုပ်ခေါင်းပေါ်ကိုရွက်လို့ ကျုပ်အဖေနဲ့အမေက လင်ပါသမီးကိုခါးထစ်ခွင်ပြီးအထုပ်ပိုက်ပြီးလင်အိမ်ကဆင်းလာတဲ့ကျုပ်ကို အံ့အားကြီးသင့် လို့ ငေး

******************

ဇာတ်ပေါင်းထုပ်ကြတော့ ကျုပ်လင် ကဖိုးအေးလဲအရက်ပြတ်
ကျုပ်လဲ ဇီးကွက်မကို သမီးသမီး နှုတ်ဖျားကမချ
ဇီးကွက်မကလည်း ကျုပ်သွားလေရာ အမေ အမေနဲ့တတန်းတန်းပါလို့

ကျုပ် ပြုံးမိပါသေးတယ်တော်
အခုဆိုရင်လေ ကျုပ်ကိုဘယ်သူတွေဘာပြောပြော
ဂရုကိုမစိုက်တော့တာ
ပြောချင်တဲ့သူတွေပြောကြစမ်း
ကျုပ်ကလည်း ပြန်ပြီး ပြောလိုက်ချင်တာမှ

ကျုပ်က မိထွေးလေ မိထွေး လို့သာ

ဖြစ်ရပ်မှန်တစ်ခုကို ကာယကံရှင်ကိုယ်တိုင်ပြန်ပြောပြသည့်စကားအတိုင်းရေးဖွဲ့ပါသည်

လူနဲ့လူချင်း ချစ်ခြင်းမေတ္တာအရင်းခံ၍ပေါင်းသင်းဆက်ဆံနိုင်ကြပါစေ

ရွက်ဝါရင့်ရင့်