လူဖြစ်ခွင့်

လူဖြစ်ခွင့်(စ/ဆုံး)
————–

နေ့လည်ထမင်းစားချိန်ကျောင်းတက်ပီးမြန်မာစာဆရာမရဲ့အတန်းချိန်မှာ ဆရာမစာသင်နေတုန်း ကျောင်းက အထွေထွေလုပ်သားကဆရာမကို ရုံးခန်းကခေါ်တယ်ဆိုပီးလာခေါ်လို့ ဆရာမက အတန်းကိုမဆူဖို့ စာကျက်နေဖို့မှာပီး လိုက်သွားတယ်

ကျွန်မတို့ပဥ္စမတန်း အဆောင်နဲ့ကျောင်းရုံးခန်းကမလှမ်းမကမ်းလေးဘဲမို့ ၁၀မိနစ်လောက်အကြာမှာဆရာမနဲ့အထွေထွေလုပ်သားပါပြန်ရောက်လာတယ် အတန်းထဲရောက်တယ်ဆိုရင်ဘဲဆရာမက ကျွန်မထိုင်တဲ့ ထိုင်ခုံကိုတန်းတန်းမတ်မတ်လာခဲ့ပီး ကျွန်မကို အကြည့်တမျိုးနဲ့ ကြည့်ပီး သမီးရေ သူနဲ့အတူတူရုံးခန်းကို ခဏလိုက်သွားနော်ဆိုပီး အပြင်ဘက်က ရပ်စောင့်နေတဲ့ အထွေထွေလုပ်သားကို လက်ညှိုးညွှန်ပြတယ် ကျွန်မရင်တွေ တဒိန်းဒိန်းတုန်သွားတယ် ရုံးခန်းဆိုတာအပစ် ရှိတဲ့သူတွေ သွားတဲ့နေရာ
ကျွန်မက ဒီနှစ်မှ နယ်ကပြောင်းလာတဲ့ကျောင်းသူအသစ်
အပစ်လည်း ဘာမှမလုပ်ထားမိပါဘဲ ဘာကြောင့်ရုံးခန်းက ခေါ်ရတာလည်းဆိုပီး ဒူးတွေတုန် အသံတွေတုန်ပီး ဆရာမ
သမီး မှာဘာအပြစ်ရှိလို့ ရုံးခန်းက ခေါ်တာလည်းဆိုတော့
ဆရာမက ကျွန်မခေါင်းလေးကိုပွတ်ပီး အပြစ်ရှိလို့ ခေါ်တာမဟုတ်ပါဘူး သမီးရယ် ရုံးခန်းမှာ သမီးနဲ့တွေ့ချင်တဲ့ဧည့်သည်ရောက်နေလို့ပါကွယ်တဲ့ ကျွန်မ တော်တော်လေးအံ့သြသွားတယ် နယ်ကနေဒီနှစ်မှပြောင်းလာတဲ့မလည်မဝယ်ကလေးမတယောက်စီကို ဧည့်သည်လာတယ် နောက်လာတဲ့နေရာကလည်း ကျောင်းရဲ့ရုံးခန်း ကျောင်းနဲ့အိမ်ကလည်း
လမ်းဘဲခြားတာ အတွေးများစွာနဲ့ ကျွန်မရုံးခန်းကိုလိုက်သွားခဲ့တယ်

ရုံးခန်းကိုရောက်တော့ ထိုင်ခုံမှာထိုင်နေတဲ့ ယောက်ကျားနှစ်ယောက်ကိုတွေ့လိုက်ရတယ် ဆရာမကြီးက လာသမီး ဒီမှာ သမီးနဲ့တွေ့ခွင့်တောင်းလို့ သမီးမေမေ ရေးပေးလိုက်တဲ့စာလည်းပါတယ်ဆိုပီး ကျွန်မကို စာနှစ်စောင်ထဲက တစောင်ကိုပေးဖတ်တယ် စာထဲမှာ ကျွန်မမေမေ လက်ရေးနဲ့တိုတိုတုတ်တုတ်ဘဲ ဒါသမီးအဖေဘဲ ပထမဆုံးနဲ့နောက်ဆုံးအကြိမ် တွေ့ခွင့်တောင်းလို့တွေ့ခွင့်ပေးလိုက်တယ် တဲ့

ယောက်ကျားနှစ်ယောက်ထဲက တယောက်က ကျွန်မကို သမီး
ဖေဖေ လေတဲ့ သမီးရဲ့ဖေဖေပါတဲ့ ရုပ်ရှင်ထဲကလိုတော့ ကျွန်မ ပြေးမဖက်မိဘူး ပြောစရာစကား မရှိသလို အဲ့လူရဲ့
မျက်နှာကိုဘဲစိုက်ကြည့်နေလိုက်တယ် ကျွန်မ လက်အစုံကို ဆုပ်ကိုင်ပီး ပြောသွားတဲ့စကားတွေက အများကြီးဘဲ
သေချာတာက ကျွန်မ တခွန်းမှ ပြန်မပြောလိုက်ဘူး

စကားတွေအများကြီးက မှတ်မိနေတာက သူက သာသနာ့ဘောင်ကိုအပီးဝင်တော့မှာမို့သမီး ကိုလာတွေ့တာ မိတ္ထီလာ
ကသမီးဖိုးဖိုးလာခေါ်ရင် မကြာမကြာလိုက်လည်ပါ
သူ့ရဲ့ ရပိုင်ခွင့်ကို သမီးအတွက် ပေးဖို့ ဖိုးဖိုးကို မှာထားခဲ့တဲ့အကြောင်း တစ်နာရီလောက်တော့ကြာမယ်ထင်ရဲ့ စကားတွေပြောတာ စကားပြောပီးတော့ ဆရာမကြီးစီမှာခွင့်တောင်းပီး
ဘေးကလူက အိတ်ထဲက ဓါတ်ပုံကင်မရာထုတ်ပီး အဖေ လို့ပြောတဲ့လူနဲ့ကျွန်မကို တွဲပီးဓါတ်ပုံရိုက်ပေးတယ် ကျွန်မကိုသီးသန့်တပုံရိုက်တယ် ပီးတော့ စီတီဇင်ဓါတ်ခဲနာရီလေးနဲ့ငွေစက္ကူအချို့ ကျွန်မလက်ကိုထည့်ပီး ပြန်သွားကြတယ်

ကျွန်မလည်းခေါင်းငိုက်စိုက်ကျပီးကျောင်းခန်းဘက်ကိုပြန်လာခဲ့တယ် ခေါင်းထဲမှာတွေးတောဖို့ဥာဏ်ရည်မမှီတော့တဲ့လူတယောက်လို ဗလာကြီးဖြစ်နေတယ်
ကျောင်းခန်းထဲကိုရောက်တော့ မြန်မာစာဆရာမ မဟုတ်တော့ဘူး အချိန်ပြောင်းသွားပီ ကျွန်မလည်း ဝင်ခွင့်ပြုပါလို့ ခွင့်တောင်းပီး အတန်းထဲကိုဝင်တော့ တခန်းလုံးက လူတွေကျွန်မကို ဝိုင်းကြည့်နေသလို ခံစားရတယ် အကြောင်းအရင်းကို သူတို့ သိလားမသိဘူးလားဆိုတာ ကျွန်မသေချာမသိပေမယ့်
ကျွန်မ ကတော့ခံစားချက်တွေမကောင်းဘူး

ကျောင်းဆင်းချိန် အိမ်ပြန်ရောက်တော့ အမေက ကျွန်မကို ဘာတခွန်းမှ မမေးသလို ကျွန်မကလည်း ဘာတခွန်းမှမပြောခဲ့ဘူး ဒီအတိုင်းဆုပ်ကိုင်လာလို့ဘယ်လောက်မှန်းမသိတဲ့ ငွေစက္ကူ ကိုတော့အမေ့လက်ထဲထည့်လိုက်တယ် စီတီဇင် နာရီလေးကိုတော့ ကျွန်မ အဝတ်စားတွေထည့်တဲ့ ပုံးကလေးရဲ့ အောက်ဆုံးမှာ ထည့်ပီးသိမ်းထားလိုက်တယ်

အဲ့အချိန်ကစလို့ ကျုပ်ညညဆို အိပ်မပျော်တော့ဘူး ခင်ဗျားတို့ကဘာတွေလည်း ၁၁ နှစ်အရွယ်ကလေးတယောက်ရဲ့ ခံစားချက်ကို ထည့်မစဥ်းစားပေးတာလား ကလေးမှာလည်း
နှလုံးသားနဲ့ပါ နှလုံးသားတောင်မှ အကောင်းအတိုင်းရှိနေတဲ့ နှလုံးသားမဟုတ်ဘူး ဒဏ်ရာတွေဗရပွနဲ့ နှလုံးသားယိုင်နဲ့နဲ့ပါ
လူမှန်းသိတတ်ကာစထဲက အဖေ ဆိုတာဘာမှန်းမသိဘူး
ကျုပ်ဘဝရဲ့ကမ္ဘာကြီးလို့ထင်တဲ့ အမေကလည်း ကျုပ်ကို တယောက်ထဲချန်ထားရက်ပီး ဘဝသစ်တခုထူထောင်သွားခဲ့တယ် အဖွားရဲ့မေတ္တာဟာ လိုအပ်ချက်မရှိပေမယ့် ကျုပ်လည်း တခြားကလေးတွေလို ဖေဖေ မေမေ လို့ခေါ်ချင်တာပေါ့ အမေစီကို တူတူလိုက်နေခွင့်ရတာတောင် အမေကျမ်းမာရေးမကောင်းလို့ ကျုပ်လိုက်နေခဲ့ရတာ မကြာသေးဘူး

ခင်ဗျားတို့ တကယ်မကောင်းကြဘူး အဖေဆိုတဲ့လူကော ကျုပ်ခံစားချက်ကို မမေးဘဲ အဖေ ကိုတွေ့ခွင့်ပေးလိုက်တဲ့အမေကောဘဲ တကယ်ဆို ကျုပ်ကို မေးပါဦးလား တွေ့ချင်တယ်
မတွေ့ချင်ဘူးဆိုတာ ခင်ဗျားတို့ရဲ့ အတိတ်ဇာတ်ကြောင်းတွေကို ကျုပ်စိတ်မဝင်စားဘူး စိတ်ဝင်စားလည်း ကျုပ်အတွက် နာကျဥ်စရာတွေကြီးဘဲ နေမှာ အမှန်ဆို ခင်ဗျားတို့ ကျုပ်ကို
မွေးဖွားလာဖို့မသင့်ဘူး

ဒါပေမယ့် ကျုပ်ကပျော့ညံ့တယ် စိတ်ထဲကခံစားချက်ကို ဘယ်သူ့ကိုမှဖွင့်ပြောလေ့မရှိဘူး တယောက်ထဲကြိတ်ခံစားတယ် အဓိက အတူတူနေရတာ မကြာသေးတဲ့ ကျမ်းမာရေးမကောင်းတဲ့ ကျုပ်အမေ စိတ်ညစ်မှာ အရမ်းစိုးရိမ်တယ် ဒါကြောင့်ကျုပ် ဘာခံစားချက်မှမရှိတဲ့ လူတယောက်လိုနေပြခဲ့တယ်

ကျုပ်လေ ကျုပ်ရဲ့ ဂျပ်ဖာလေးအောက်ဆုံးက နာရီလေးကိုတော့ ခဏတိုင်း ထုတ်ထုတ်ပီးကြည့်မိပါတယ် ပွန်းပဲ့သွားမှာ
ကြောက်လို့ ကျုပ် လက်ပေါ်မှာကို မပတ်ရက်ခဲ့ဘူး
တရက်မှာတော့ ကျုပ်ရဲ့ နာရီလေးပျောက်ခြင်းမလှ ပျောက်သွားခဲ့တယ် ကျုပ်မှာ ကျစရာမျက်ရည်လည်းမရှိတော့ပါဘူး
ဘယ်ရောက်သွားတယ် ဘယ်သူယူသွားတယ်ဆိုတာလည်း
အဖြေမရှာကြည့်လိုက်ဘူး ညအိပ်ရာဝင်တိုင်း နာရီလေးက မျက်စိထဲမှာတဝဲလည်လည်ဘဲ မျက်ဝန်းထဲကအရည်တချို့ကလည်း လျှံကျလာတယ် ကျုပ်နာရီလေးကို နှမျောလို့

နွေရာသီကျောင်းပိတ်ရက်တခု မှာ ကျုပ်အဖေရဲ့ ညီလို့ပြောတာဘဲ သူကလည်း မန်းမှာ GTIကျောင်းတက်တာတဲ့ ကျုပ်ကို သူ့အဖေက ခေါ်ခဲ့ခိုင်းလို့ အလည်ခေါ်သွားပါရစေဆိုပီး
အမေ့စီမှာခွင့်လာတောင်းတယ် ကျုပ်က ၇တန်းစာမေးပွဲဖြေပီးနေချိန် ဒီတခါတော့ ကျုပ်ကိုအမေကမေးတယ် လိုက်သွားချင်လားတဲ့ အမှန်ပြောရရင် ကျုပ်မလိုက်ချင်ဘူး အမေကလည်းကျမ်းမာရေးမကောင်းဘူး မောင်အငယ်လေးကို ကျုပ်စိတ်မချဘူး အမေ့ကျမ်းမာရေးက ခုထဖြစ်ချင်ရင် ထဖြစ်တာ
ဒါပေမယ့် ကျုပ်လိုက်သွားမယ်လို့ခေါင်းညိတ်မိလိုက်တယ်

မိတ္ထီလာရောက်တော့ အမျိုးတွေက အများကြီးပါ ကျုပ်လည်းသိပ်မမှတ်မိပါဘူး မှတ်မိတာကတော့ ကျုပ်အဖိုးဆိုတဲ့လူရယ် ကျုပ်အဖေ ရဲ့ညီမလို့ပြောတာဘဲ ခပ်ချောချော အန်တီတယောက်ရယ်ကိုဘဲ မှတ်မိတော့တယ် ဒါတောင်အဲ့အန်တီက ကျုပ်ကိုဖက်ဖက်ပီးငိုလို့ အမျိုးတွေကလည်း ကျုပ်အဖေရဲ့ငယ်နာမည်ကိုပြောပြောပီး ကျုပ်နဲ့တူလွန်းလို့တဲ့လေ
ကျုပ်လည်းစိတ်ထဲကနေ ဒါတောင်အမေက အဖေနဲ့ တူလွန်းလို့ဆိုပီး ကျုပ်မှာပါတဲ့ သွားတက် ကိုအမေကိုယ်တိုင် အပ်ချည်ကြိုးနဲ့ အစိမ်းဆွဲနှုတ်ပေးခဲ့လို့ ဒီလောက်ဘဲတူတာ

အဖေဆိုတဲ့လူကိုတော့ ကျုပ်မတွေ့မိသလို မေးလည်းမမေးကြည့်ခဲ့ဘူး လူကြီးတွေရဲ့ပြောစကားအရ ပုပ္ပါးဘက်ကို ရဟန်းဝတ်နဲ့အပီးထွက်သွားခဲ့တာ တခါမှပေါ်မလာတော့ဘူးတဲ့ အွင်း ကောင်းပါတယ် ကောင်းပါပေတယ်
ခင်ဗျားကတော့ သံသရာအတွက် အကောင်းဆုံးလုပ်သွားခဲ့တာ ခင်ဗျားကိုယ်ကို ချစ်သွားခဲ့တာ

ဒီလိုဆိုရင်လည်း ခင်ဗျား ကျုပ်ကို လာမတွေ့တော့နဲ့လေ တခါလောက်နဲ့တော့ ခင်ဗျား ကျုပ်ကိုလာမတွေ့သင့်ဘူး
ဘာရည်ရွယ်ချက်ရှိရှိနဲ့ လာတွေ့ရတာလည်း အမေ တယောက်ထဲပေးတဲ့ဒဏ်ရာနဲ့ဆို မညီမျှလို့ ညီမျှအောင် ခင်ဗျားကကျုပ်ကို ဒဏ်ရာတွေဖြစ်အောင် လာလုပ်သွားခဲ့တာလား

ခင်ဗျားတို့အတော်ရက်စက်တဲ့လူတွေ နှလုံးသားမရှိတဲ့လူတွေ
ခင်ဗျားတို့ဖြစ်ချင်တာဘဲကြည့်တဲ့အတ္တသမားတွေ ကျုပ်က
ခင်ဗျားလိုချင်သည်ဖြစ်စေ မလိုချင်သည်ဖြစ်စေ
ခင်ဗျားတို့ကြောင့်လူဖြစ်လာရတဲ့ လူတယောက်လေ
လူဆိုတဲ့အတိုင်း နှလုံးသားရှိတယ်ခံစားတတ်တယ်

ဒီခရီးကိုကျုပ်လိုက်လာခဲ့တာ အဖေဆိုတဲ့ခင်ဗျားကိုနောက်တခေါက်လောက်များ ထပ်တွေ့ခွင့်ရမလားဆိုတဲ့မျှော်လင့်ချက်နဲ့ လိုက်လာခဲ့တာပါ မတွေ့ရဘူး မရှိဘူးဆိုတော့လည်း ကျုပ်ပြန်ရုံပေါ့ ကျုပ်မနေနိုင်ဘူးဆိုပီးအတင်းပြန်ပို့ခိုင်းလို့ အဖိုးက ကျုပ်ကို အမေ့စီကို ပြန်ပို့တယ် ကျုပ်အိမ်ပြန်ရောက်တော့
ပျော်သွားတဲ့ ကျုပ်အမေ မျက်နှာကိုကြည့်ပီး သြော် ကျုပ် မြန်မြန်ပြန်ခဲ့တာ မှန်ပါလားလို့ အဖိုးကတော့ အမေ့စီမှာခွင့်တောင်းတယ် မကြာမကြာ အလည်အပတ်လာခေါ်ဖို့အမေကတော့ ဘာမှမပြောဘူး ကျုပ်ကတော့ယတိပြတ်ငြင်းလိုက်တယ် နောက်ဘယ်တော့မှလာမခေါ်တော့ဖို့ ဘယ်တော့မှလိုက်တော့မှာ မဟုတ်တဲ့အကြောင်းကိုပေါ့

အဖေဆိုတဲ့လူရေ ခင်ဗျားကတော့ကျုပ်ကို တသက်မှာတခါ
တခါမှာ တစ်နှစ်ရီကြာဘဲလာတွေ့သွားပေမယ့် ကျုပ်မှာတော့
စိတ္တအရူးတယောက်လို့ ခင်ဗျားပေးခဲ့တဲ့ နာရီပုံစံနဲ့ခပ်ဆင်ဆင်တူတဲ့ ဟာတွေ့တိုင်း လိုလိုချင်ချင်မက်မက်မောမော ဝယ်သိမ်းမိတယ် ခရီးထွက်လို့ မိတ္ထီလာမြို့ကိုဖြတ်ဖြစ်တဲ့အခါတိုင်း ကျုပ်နှလုံးသားတွေနာကျဥ်ရတယ်

ပုပ္ပါးမြေကို ချေခြမိတယ်ဆိုရင်တော့ ကျုပ်ရဲ့ သိစိတ် မသိစိတ် ကပါ သင်္ကန်းဝတ်နဲ့ပုဂ္ဂိုလ်တွေကိုမြင်တိုင်း ခင်ဗျားများဖြစ်နေမလားဆိုပီး လိုက်ကြည့်မိတယ်
ငယ်ရွယ်တဲ့စိတ်တုန်းကတော့ တခါလောက်လေးများပြန်တွေ့ခွင့်ရလေမလားလို့ ကျုပ်မျှော်လင့်မိတယ် တွေ့ခွင့်ရချင်ခဲ့တယ် ရင့်ကျက်လာတဲ့နောက်ပိုင်းမှာတော့ ခင်ဗျားက သံသရာအတွက်အပီးဖြတ်သွားခဲ့တာဘဲလေ ကျုပ်ကိုတွေ့ချင်ရင်
အလွယ်တကူတွေ့လို့ရတာဘဲ မတွေ့ချင်တော့လို့ ဖြတ်တောက်သွားခဲ့တာဆိုတာ ကျုပ်နားလည်လာတဲ့နောက်ပိုင်း
ကျုပ်စိတ်ကို ကျုပ် လွတ်ချလိုက်တယ် နာကျဥ်ရမယ့်အရာမှန်သမျှ လွတ်ချပစ်လိုက်တယ်

အရွယ်ရောက်လာတာနဲ့အမျှ ချစ်ခြင်း မုန်းခြင်းတွေ ပျော်ရွှင်ခြင်း ဝမ်းနည်းခြင်းတွေကို ခံစားတတ်လာတော့ အချစ်ကြောင့်ဖြစ်တဲ့ ချိုမြိန်ခြင်း အမုန်းကြောင့် ဖြစ်လာတဲ့ခါးသက်မှု့ အဲ့အရသာကို ကျုပ်ကြိုက်နှစ်သက်လာခဲ့တယ်
ပျော်စရာရှိရင် ဟားတိုက်ရီမောပီး ဝမ်းနည်းစရာရှိရင်
ငိုကြွေးပစ်လိုက်တယ် လူဖြစ်ရခြင်းရဲ့ အရသာကို ကျုပ် သိလာခဲ့တဲ့အချိန်မှာတော့

ကျုပ်ကို လူဖြစ်ခွင့်ပေးတဲ့ အဖေနဲ့ အမေကို ကျေးဇူးတင်ပါတယ် ဒီဘဝမှာ မွေးကျေးဇူးဆပ်ခွင့်မကြုံခဲ့ပေမယ့် သံသရာမှာ မိဘနဲ့သားသမီးဆိုတဲ့ ဘဝမျိုးကိုကြုံဆုံခွင့်ရခဲ့မယ်ဆို
ဒီဘဝလို နာကျဥ်စရာ အဖြစ်ဆိုးမျိုးတွေနဲ့မဟုတ်ဘဲ
မိဘနှစ်ပါးစုံလင်တဲ့ အဖြစ်မျိုးနဲ့ မိဘကျေးဇူးဆပ်ခွင့်ရတဲ့ သားသမီးဘဝမျိုး ရခွင့် ဖြစ်ခွင့် ရချင်ပါတယ်

ကမ္ဘာပေါ်မှာ ရှိတဲ့မိဘတိုင်း လူသားအဖြစ် မွေးဖွားလာမယ့်
ကလေးတိုင်းကို လူဖြစ်ခွင့် ပေးနိုင်ကြပါစေလို့
ကျုပ်ဆုတောင်းလိုက်ပါတယ်

မယ်ငြိမ်း