တစ်ဖက်လပ်အဖေ(စ/ဆုံး)
———————-
ကျွန်တော် လူဆိုးတစ်ယောက် ဖြစ်ပါသည်။
ကျွန်တော့်အဖေက ကျွန်တော်တက်နေသည့် အထက်တန်းကျောင်းတွင် ကျောင်းစောင့်ဖြစ်သည်။ ကျွန်တော့် အမေမှာ ကျွန်တော်ငယ်စဉ်ကတည်းက ကျွန်တော်နှင့်အဖေ့ကို ထားသွားကာ ထွက်ပြေးသွားသည်။ ဘယ်ရောက်၍ ဘယ်ပေါက်မှန်း ယနေ့တိုင်မသိ။
ကျွန်တော့်ကို ကျောင်းထားပေးသည်မှာ ကျောင်းအုပ်ဆရာကြီးကဖြစ်သည်။ အဖေ့ကြောင့် ဤကျောင်းသို့ ကျွန်တော် တက်ခွင့်ရသည်။ သို့သော် အဖေက ကျွန်တော်နှင့် ကင်းကင်းနေသည်။ ကျွန်တော့်ကို အဘိုးနှင့်အတူ နေစေသည်။ ကျောင်းစောင့်သားဆိုပြီး ကျွန်တော့်ကို ဂုဏ်ငယ်မှာစိုးသောကြောင့်ဖြစ်သည်။
ကျွန်တော်ဆိုးပါသည်။ မူးယစ်ဆေးရောင်းသည့် အဖွဲ့တစ်ဖွဲ့နှင့် သွားပတ်သက်မိသည်။ မူးယစ်ဆေးဖြန့်ပေးမိ သည်။ တစ်နေ့တွင် မူးယစ်ဆေးတွေကိုထားပြီး ထွက်ပြေးရသည့် အခြေအနေတစ်ခုသို့ ရောက်သွားသည်။
ကျွန်တော် ထွက်ပြေးနေရချိန်တွင် အဖေဆေးရုံတက်ရကြောင်းကြားသည်။ အဖေ့မျက်လုံးတစ်လုံး ကွယ်သွား သည်။ စက်ဘီးမှောက်စဉ် ကျောက်တုံးတစ်တုံးနှင့် မျက်စိကို ထိခိုက်မိသောကြောင့်ဟုဆိုသည်။
အဖေဆေးရုံကဆင်းသော် ကျောင်းအုပ်ကြီးက သနားသဖြင့် ကျောင်းတွင် ကျောင်းစောင့်ဆက်ခန့်ထားသည်။ အဖေကား မျက်လုံးတစ်လုံးဟောက်ပက်ကြီးဖြစ်နေသည်။ ကျွန်တော့်ကို မူးယစ်ဆေးရောင်းခိုင်းသူမှာ ရဲအဖမ်းခံလိုက်ရသောကြောင့် ပြဿနာအေးသွားသည်။ ကျွန်တော် ကျောင်းဆက်တက်နိုင်သည်။
ထိုနေ့ကား နောက်ဆုံးနှစ် ကျောင်းသားများ၏ ကျောင်းနှစ်ပတ်လည် မိတ်ဆုံစားပွဲနေ့ဖြစ်သည်။ မိဘများကို ခေါ်လာရသည်။ ကျွန်တော်လည်း အထက်တန်း အောင်မြင်ပြီဖြစ်သောကြောင့် သူငယ်ချင်းများနှင့် ထိုမိတ်ဆုံ စားပွဲတွင် ပျော်ကြသည်။
ကျောင်းအုပ်ကြီးက အခမ်းအနားတွင် ကျွန်တော့်အဖေကို ဆုချီးမြှင့်သည်။ မကြာခင် အဖေ့ကို ပင်စင်ပေး တော့မည်ဖြစ်သောကြောင့် ပိုက်ဆံတွေကို ဝန်ထမ်းတွေက စုပေးကြသည်။ အဖေ့ကို ကျောင်းအုပ်ဆရာကြီးက ချီးကျူးစဉ်
“သူဟာ ကျောင်းစောင့်အဖြစ် နှစ်ပေါင်းများစွာ တာဝန်ကျေစွာ ထမ်းဆောင်ခဲ့ပါတယ် … ခုဆိုရင် သူ့သားဟာလည်း ကျွန်တော်တို့ကျောင်းကနေ အထက်တန်းအောင်မြင်ခဲ့ပါပြီ … ဆင်းရဲသားရပ်ကွက် လေးကနေ သားတစ်ယောက်ကို ပညာတတ်အောင် ပထမဆုံးပြုစုပျိုးထောင်ပေးခဲ့တဲ့ ဖခင်တစ်ယောက် အနေနဲ့လည်း ကျွန်တော်သူ့ကို ဂုဏ်ပြုလိုက်ပါတယ်”
လူတွေက လက်ခုပ်တီးကြသော်လည်း ကျွန်တော့်သူငယ်ချင်းတွေကတော့ ကျွန်တော့်ကို ပြုံးစစနှင့် ကြည့် နေသည့် အကြည့်များကို မခံနိုင်သည့်အဆုံးတွင် ကျွန်တော် မိတ်ဆုံစားပွဲမှ တိတ်တိတ်လေးထွက်ခွာလာခဲ့ သည်။
အဖေက စက်ဘီးလေးနှင့် မိုးလင်းသော် ပြန်လာသည်။ ကျွန်တော်ကစိတ်ဆိုးစွာဖြင့်
“ကျောင်းစောင့်သား အထက်တန်းအောင်တယ်ဆိုပြီး ဂုဏ်ယူနေတာပေါ့လေ” ဟု အဖေ့ကို ဆီးပြောလိုက် သည်။
“ဂုဏ်ယူတာပေါ့သားရယ် … အဖေက သားကို ပညာတတ်ကြီးဖြစ်စေချင်တာ”
“ပညာတတ်တော့ ဘာဖြစ်သလဲ … ကျွန်တော့်ကို မှီခိုစားမယ်ပေါ့ ဟုတ်လား”
“မဟုတ်ဘူးသား … ပညာတတ်သွားတော့ မင်းဘဝကောင်းစားသွားမှာကို အဖေက မြင်ချင်တာ”
“တော်စမ်းပါဗျာ”
ထိုနေ့တွင် ကျွန်တော်အိမ်က ထွက်ခဲ့သည်။ အိမ်က အပြီးတိုင်ထွက်ခဲ့ခြင်းဖြစ်သည်။ အိမ်ကို မပြန်တော့။ မြို့တက်ပြီး ကိုယ့်ဘဝကိုယ်ထူထောင်သည်။ ကောလိပ်တက်သည်၊ တက္ကသိုလ်ပြီးသည်။ အင်ဂျင်နီယာ တစ်ယောက်ဖြစ်လာသည်။ ကိုယ့်ဘဝကို ရုန်းကန်ပြီး ကိုယ်တိုင်ကြိုးစားတည်ဆောက်နိုင်ခဲ့သည်ကို ပီတိ ဖြစ်နေမိသည်။
ကျွန်တော် အိမ်ထောင်ကျသည်။ သားသမီး နှစ်ယောက်ရလာသည်။ တစ်နေ့ ကျွန်တော် ရုံးမှအိမ်ပြန်လာစဉ် ခြံဝ၌ အဘိုးအိုတစ်ယောက်ကို တွေ့လိုက်ရသည်။ ကားမှန်ကိုချပြီး
“ဘယ်သူလဲ … ဘာကိစ္စလဲ” ဟု မေးလိုက်သည်။
ထိုသူက လှည့်ကြည့်လိုက်ရာ မျက်စိတစ်ဖက်လပ် ရုပ်ဆိုးလှသော ကျွန်တော့်အဖေကို တွေ့လိုက်ရသည်။ ကျွန်တော့်ဘေးတွင် ထိုင်လိုက်လာသည့် ဇနီးက
“သူတောင်းစားလားမသိဘူး” ဟုဆိုသည်
“ဘာလာလုပ်တာလဲ” ဟု ကျွန်တော်က မေးလိုက်သည်၊ သူက
“ဟို … ဟို … ဘာမှမဟုတ်ပါဘူး … လိပ်စာမှားလို့ပါ” ဟုပြောကာ ကျွန်တော်တို့ရှေ့မှ အမြန်ထွက်သွားသည်။
ကျွန်တော်စိတ်ပျက်သွားမိသည်။ ယခုလို အခြေအနေမျိုးတွင် ဘာလာပြီး ကျွန်တော့်ကို ဒုက္ခပေးဦးမည်မသိ။
တစ်နေ့တွင် ကျွန်တော့်အထက်တန်းကျောင်းမှ ကျောင်းသားဟောင်းများ မိတ်ဆုံစားပွဲဖိတ်စာ ရောက်လာ သည်။ ကျွန်တော်က ထိုမိတ်ဆုံစားပွဲကို အကြောင်းပြပြီး ဇာတိမြို့လေးကို ထွက်လာခဲ့သည်။ အဖေ့ကိုလည်း သတိပေးချင်သည်။ ကျွန်တော့် သာယာနေသည့် ဘဝလေးကို လာပြီးမဖျက်ဆီးရန်ဖြစ်သည်။
ကျွန်တော့်အိမ်ရှေ့ကို ကားရပ်လိုက်သည့်အခါ လူတွေစည်ကားနေသည်။ ဘာကြောင့် ပွဲလုပ်နေသနည်းဟု စုံစမ်းကြည့်သောအခါ ကျွန်တော့်ဖခင် သေဆုံးသွားသည့်အတွက် တစ်လပြည့် အထိမ်းအမှတ် လုပ်နေခြင်း ဖြစ်ကြောင်း သိလိုက်ရသည်။ ကျွန်တော့်အဘိုး ဆုံးသွားသည်မှာလည်း ငါးနှစ်ခန့်ရှိပြီဟု သိရသည်။ ကျွန်တော့် ဦးလေးတစ်ယောက်က ကျွန်တော့်ကို စာတစ်စောင်လာပေးသည်
“မင်းအဖေ မသေခင် မင်းဆီကို စာရောက်အောင်ပို့ပေးဖို့ မှာသွားတယ်” ဟုဆိုသည်
စာပေါ်တွင် ကျွန်တော့်လိပ်စာရေးထားသည်။
ကျွန်တော်က ကားပေါ်ပြန်တက်ပြီး စာဖတ်လိုက်သည်
သား
သားအိမ်ကို လာကြည့်မိတာ တောင်းပန်ပါတယ်။ အဖေ့မြေးလေးတွေရှိနေပြီဆိုတာ ကြားလို့ တွေ့ချင်တာ ကြောင့် လာကြည့်တာ။ သားတို့ကို ဂုဏ်သိက္ခာကျအောင် လာလုပ်တာ မဟုတ်ပါဘူး။
သားဒီလို အခြေအနေရောက်နေတော့ အဖေသေပျော်ပါပြီ။ အဖေ့ကင်ဆာရောဂါကလည်း ကြာကြာမှ မနေရ တော့တာ။
သား သိအောင် တစ်ခုတော့ ပြောခဲ့ပါရစေ။ သား မူးယစ်ဆေးကိစ္စနဲ့ ထွက်ပြေးတော့ အိမ်ကို သားဂိုဏ်းက လူတွေ ရောက်လာကြတယ်။ သားကို မတွေ့တော့ အဖေ့ကိုဖမ်းချုပ်ပြီး မျက်လုံးတစ်လုံး ကော်ထုတ်သွား ကြတာ။ အဖေမပြောဘူးလို့ထားတာ။ အဖြစ်မှန်ကိုသားသိစေချင်လို့ပါ။
အဖေ့ကျန်တဲ့ မျက်လုံးတစ်လုံးကလည်း ဝါးနေပါပြီ။ မသေခင် မြေးလေးတွေကို တွေ့သွားချင်သား။ ဒါပေမဲ့ တွေ့ချင်မှလည်း တွေ့ရမှာပါ။
အဖေ့အတွက် စိတ်ထဲမှာ ဘာမှမဖြစ်ပါနဲ့သား
အဖေ
(One Eye Dad)
တင်ညွန့်
၂၃.၁၀.၂၀၂၀